Presidenti i SHBA Joe Biden ka pranuar ‘dallimet’ midis anëtarëve të NATO-s në lidhje me mënyrën se si blloku ushtarak do t’i përgjigjej ‘agresionit’ rus në Ukrainë.
Ai gjithashtu pranoi se SHBA dhe aleatët e saj do të vuajnë gjithashtu nga vendosja e sanksioneve të rënda kundër Moskës.
“Ka dallime në NATO në lidhje me atë që vendet janë të gatshme të bëjnë, në varësi të asaj që ndodh.” – u tha Biden gazetarëve. Përgjigja do të varet nga shkalla e lëvizjes ruse kundër Kievit.
Në një moment, Biden sugjeroi se një ‘inkursion i vogël’ mund të mos kërkonte një përgjigje të ashpër. Ai dha shembullin e luftës kibernetike, në krahasim me vrasjen e trupave ukrainase, dhe tha, “Ne mund të përgjigjemi në të njëjtën mënyrë”.
Biden i bëri komentet në konferencën e tij të dytë të rëndësishme për shtyp që nga marrja e detyrës një vit më parë, duke paraqitur një pamje të errët të perspektivave për luftën në Ukrainë.
Ai tha se Rusia ka të ngjarë të bëjë disa përpjekje për të testuar dhe përçarë NATO-n, duke shtuar se një pushtim në shkallë të plotë do të ishte katastrofik për Moskën, por gjithashtu i dhimbshëm për aleatët perëndimorë.
Biden tha se Rusia mund të fitojë përfundimisht një luftë konvencionale me armë zjarri me Ukrainën, me kosto të rënda jetësh, por kostot e pushtimit do të ishin të mëdha.
Ai shtoi se sanksionet që do pasojnë kundër Moskës, duke përfshirë eliminimin e mundshëm të aftësisë së bankave ruse për të kryer transaksione në dollarë amerikanë, do të kishin ndikim edhe në ekonominë amerikane.
“Dua të jem i qartë me ju, vendosja e sanksioneve në lidhje me transaksionet në dollarë dhe gjëra të tjera, janë gjëra që do të kenë një ndikim negativ në Shtetet e Bashkuara, si dhe ndikime negative në ekonomitë e Evropës gjithashtu e ndikim shkatërrues në Rusi. Aleatët dhe partnerët tanë janë të gatshëm të imponojnë kosto të rënda ndaj Rusisë dhe ekonomisë ruse.” – tha Biden.
