Këngëtarja turke Sezen Aksu është vënë nën kritika nga zyrtarët qeveritarë dhe fetarë, të cilët e akuzojnë atë se ka fyer Adamin dhe Evën në tekstet e këngës së saj të vitit 2017 “Sahane Bir Sey Yasamak” (që përafërsisht përkthehet “Të jetosh është një gjë e mrekullueshme”).
Debati shpërtheu pasi diva e popit ndau këngën në llogarinë e saj zyrtare në YouTube për të shënuar Vitin e Ri, sipas Daily Sabah. Edhe pse teksti me sa duket nuk mori shumë vëmendje kur u publikua kënga, gazeta raportoi se Aksu po kritikohet për fyerje të çiftit, të cilët konsiderohen figura të shenjta në Islam dhe përmenden me tituj nderi fetar.
Kënga përmban një varg që përkthehet në ‘Përshëndeteni atë Evën dhe Adamin injorantë’. Teksti i këngës u citua si arsyeja për një kallëzim penal kundër Aksu së fundmi në Ankara për ‘fyerje të vlerave fetare’, raportoi Deutsche Welle Turkish të hënën.
“Kjo situatë ngjalli zemërim të arsyeshëm tek ata që janë pjesë e besimit islam. Në fakt, ka pasur zemërim kundër saj nga shumë njerëz në kanalin në YouTube, faqen në Facebook dhe rrjete të tjera sociale .” – tha Mikail Yilmaz, një avokat i ankuesve. Ai shtoi se Aksu përdori’”shprehje nënçmuese’ për Adamin dhe Evën ‘në një mënyrë që mund të shkaktojë zemërim publik’.
Protestuesit organizuan gjithashtu një tubim jashtë shtëpisë së saj në Stamboll raportoi Daily Sabah, duke shtuar se më shumë ankesa penale ishin paraqitur me pretendimin për fyerje të vlerave fetare. Shkelja thuhet se mbart një dënim me burg deri në një vit.
Presidenca e Çështjeve Fetare (DIB) gjithashtu lëshoi një deklaratë të hënën, duke paralajmëruar ‘ata që flasin për personalitete shembullore të nderuara nga Islami të jenë më të kujdesshëm’.
Ndërkohë, Mustafa Acikgoz, një ligjvënës me Partinë për Drejtësi dhe Zhvillim (AK) në pushtet, kritikoi Aksu në Twitter për sulmin ndaj vlerave të Turqisë ‘nën maskën e artit dhe muzikës’, ndërsa kleriku i shquar Ahmet Mahmut Unlu thuhet se e quajti atë ‘një person injorant që nuk di për fjalën e Zotit’.
Aksu nuk ka komentuar ende për këtë çështje, por artistë të tjerë e kanë mbrojtur atë. Këngëtari i njohur Mustafa Sandal e quajti atë një nga ‘poetet më të rëndësishme të vendit’.
