Një njoftim i Ministrisë së Jashtme të Mbretërisë së Bashkuar për mediat, i cili është parë dhe raportuar nga RT paraprakisht, pretendon se Britania ka ekspozuar një plan të Moskës për të vendosur një udhëheqës pro-rus në Kiev, ndërsa tensionet vazhdojnë të rriten mes kërcënimeve të pretenduara të një sulmi nga Rusia.
“Ne kemi informacione që tregojnë se qeveria ruse po kërkon të vendosë në pushtet një lider pro-rus në Kiev ndërsa shqyrton nëse do të pushtojë Ukrainën.” – thuhet në korrespondencën, e cila iu dërgua përfaqësuesve të mediave në listën e postimeve të Ministrisë së Jashtme të shtunën. Megjithatë në postë nuk u përfshi asnjë provë për të mbështetur pohimet.
Ministria madje emëroi njeriun që Kremlini supozohet se është ‘një kandidat i mundshëm’ për të zëvendësuar presidentin e tanishëm të Ukrainës, Volodymyr Zelensky. Sipas Ministrisë së Jashtme, alternativa e zgjedhur është ish-deputeti ukrainas 45-vjeçar Evgeniy Murayev.
Me origjinë nga Kharkovi, Murayev ishte anëtar i parlamentit ukrainas midis viteve 2012 dhe 2019. Megjithatë, partia e tij opozitare Blloku nuk arriti të kalonte pragun e 5% në zgjedhjet e fundit parlamentare, pasi kishte arritur të fitonte vetëm gjashtë zona elektorale.
Ministria e Jashtme këmbëngul se agjencitë ruse të inteligjencës kanë mbajtur lidhje me shumë ish- politikanë ukrainas, duke përfshirë disa zyrtarë të lartë nga qeveria e ish-presidentit Viktor Janukoviç, i cili u rrëzua si rezultat i protestave të dhunshme në rrugë në sheshin Maidan në vitin 2014.
Nikolai Azarov, i cili shërbeu si kryeministër midis 2010 dhe 2014, dy ish-zëvendëskryeministra dhe ish-zëvendës kreu i Këshillit të Sigurisë Kombëtare dhe Mbrojtjes së Ukrainës (RNBO) u përmendën gjithashtu në email.
“Disa prej tyre kanë kontakte me oficerët e inteligjencës ruse të përfshirë në planifikimin e një sulmi në Ukrainë.” – pohoi dokumenti. Letra citon gjithashtu Sekretaren e Jashtme Liz Truss, e cila pretendoi se ‘informacioni i publikuar sot hedh dritë mbi shtrirjen e veprimtarisë ruse të krijuar për të përmbysur Ukrainën dhe është një pasqyrë e mënyrës së të menduarit të Kremlinit’.
Truss paralajmëroi se çdo sulm rus në fqinjin e saj do të ishte ‘një gabim strategjik i madh me kosto të rënda’ për Kremlinin. Ajo përsëriti gjithashtu se Britania mbështet sovranitetin dhe integritetin territorial të Ukrainës dhe u kujtoi marrësve të dokumentit se ajo ishte ‘një vend i pavarur dhe sovran’.
Rusia ka mohuar vazhdimisht akuzat se po planifikon një pushtim të Ukrainës, duke i përshkruar pretendimet si përpjekje të pabaza për të nxitur ‘histerinë’.
