Themeluesi i “Wikileaks”, Julian Assange ka fituar të drejtën për t’i kërkuar Gjykatës së Lartë të bllokojë ekstradimin e tij në SHBA.
Siç shkruan BBC, gjykata e Lartë vendosi të hënën se ai kishte një pikë ligjore të diskutueshme që gjyqtarët e Gjykatës së Lartë mund të duan të marrin në konsideratë.
Vendimi do të thotë se Assange mund të bëjë kërkesë në gjykatën më të lartë të Mbretërisë së Bashkuar për një seancë dëgjimore, duke penguar çdo ekstradim nga britania për momentin.
Ai kërkohet në SHBA për publikimin e mijëra dokumenteve të klasifikuara në vitet 2010 dhe 2011. Assange kishte ngritur një pyetje ligjore mbi rrethanat në të cilat gjyqtarët morën parasysh garancitë nga SHBA se si do të trajtohej ai në burg.
Por Assange nuk ka asnjë garanci për një seancë dëgjimore, pavarësisht se është në gjendje të bëjë një kërkesë në Gjykatën e Lartë. Në praktikë kjo do të thotë se rasti i tij mund të marrë shumë muaj të tjerë për të arritur në përfundim.
Stella Moris, e fejuara e Assange dhe nëna e dy djemve të tij të vegjël, pretendoi se vendimi i Gjykatës së Lartë ishte një fitore, por tha se “ne jemi larg arritjes së drejtësisë në këtë rast”.
Duke folur jashtë gjykatës, ajo tha: “Të mos harrojmë se sa herë fitojmë, për sa kohë që kjo çështje nuk pushohet, për sa kohë që Juliani nuk lirohet, Juliani vazhdon të vuajë. Për gati tre vjet ai ka qenë në burgun e Belmarshit dhe po vuan shumë.”
Ajo shtoi se kjo luftë do të vijojë derisa Julian Assange të jetë i lirë.
