Nënkryetarja e Partisë Demokratike, Jorida Tabaku ka ngritur sot në komisionin e ekonomisë shqetësimin për rritjen e çmimeve.
Gjatë fjalës së saj, Tabaku u shpreh se rritja e çmimeve dhe e inflacionit po varfërojnë më shumë njerëzit. Ajo solli si shembull taksat e rritura për fermerët. Për këtë Tabaku bën “përgjegjëse kryesore qeverinë dhe politikat e saj të gabuara”.
“Rritja e taksave për fermerët në fund të 2021 ka sjellë dhe rritjen e çmimeve të produkteve bujqësore!
Sot fermerët janë duke dështuar dhe duke hedhur produktin e tyre sepse rritja e taksave po ndikon drejtë për drejtë në punën e tyre!”- tha Tabaku.
Deputetja demokrate kërkoi një dëgjesë me Ministrinë e Financave për situatën e rritjes së çmimeve dhe efektin e politikave fiskale tek qytetarët.
