Boris Johnson dhe figura të larta të Partisë Konservatore dyshohet se kërcënuan se do të ndalonin fondet nga zonat e rreth 12 deputetëve rebelë konservatorë nëse nuk pushonin përpjekjet e tyre për të larguar kryeministrin nga detyra, ka pohuar një zyrtar i Dhomës së Komunëve.
Deputeti laburist Chris Bryant i bëri akuzat bombë në një program radiofonik të BBC-së, duke i thënë transmetuesit publik se disa deputetë konservatorë i kishin thënë atij se ose u ishte dhënë një paralajmërim nga Johnson e ‘kamzhikët’ e partisë, ose u ishte premtuar ‘rritje e financimit’ nëse ata ‘votojnë në mënyrën e duhur’.
Duke vënë në dukje se çdo veprim i tillë ‘i paligjshëm’ përbënte ‘sjellje të pahijshme në funksione publike’, Bryant pohoi se ‘ndarja e financimit të taksapaguesve për zonat elektorale duhet të bëhet sipas nevojës, jo sipas nevojës për të mbajtur kryeministrin në detyrën e tij’.
Pretendimi i parë për ‘shantazh’ u bë të enjten nga deputeti konservator William Wragg. Ai pretendoi se kritikët e Johnson po u nënshtroheshin kërcënimeve dhe ‘kanosjes’ nga punonjësit e Downing Street. Wragg, i cili i ka dorëzuar një letër mosbesimit kryeministrit, tha për The Telegraph se do të ‘qëndronte në atë që ka thënë’ dhe se ‘asnjë presion nuk do e ndryshojë këtë’.
Megjithëse Wragg tha se kishte rregulluar të takohej me një detektiv të Scotland Yard javën e ardhshme për të diskutuar ‘disa shembuj’ të kërcënimit të qeverisë, një zëdhënës i Policisë Metropolitane nuk pranoi të konfirmonte nëse do të përfshihej në këtë çështje.
Përfshirja e mundshme e policisë do të ishte një përshkallëzim i rëndësishëm i betejës së vazhdueshme midis zyrtarëve të lartë konservatorë dhe mbështetësve të zëshëm të partisë të frustruar me udhëheqjen e Boris Johnson.
Një zëdhënës i Johnson tha të premten se zyra e kryeministrit do të nisë një hetim mbi akuzat për shantazh vetëm nëse ofroheshin prova për të mbështetur pretendimet.
