Presidenti rus Vladimir Putin ka rënë dakord me liderët e Kubës, Venezuelës dhe Nikaraguas për të zhvilluar partneritete në një sërë fushash, duke përfshirë rritjen e bashkëpunimit ushtarak, ka njoftuar ministri i Jashtëm Sergej Lavrov.
Duke folur të mërkurën në një paraqitje para Dumës – parlamentit të Rusisë – Lavrov raportoi se Putin kishte biseduar së fundmi me liderët e tre vendeve të Amerikës Qendrore dhe se ata kishin rënë dakord të punonin së bashku për të forcuar bashkëpunimin e tyre strategjik.
“Presidenti Putin zhvilloi biseda telefonike të fundit me kolegët e tij nga këto tri qeveri, me të cilët jemi shumë të afërt dhe miqësor, dhe ata ranë dakord të shikojnë mënyra të mëtejshme për të thelluar partneritetin tonë strategjik në të gjitha fushat, pa përjashtim”, tha Lavrov. Ai vuri në dukje se Rusia tashmë ka marrëdhënie të ngushta me këto vende në shumë sfera, “përfshirë ato ushtarake dhe ushtarako-teknike”.
I pyetur për perspektivat e rritjes së bashkëpunimit ushtarak me të tre vendet, Lavrov u përgjigj se “për të ardhmen e afërt, ne po llogarisim në takimet e rregullta të komiteteve përkatëse”.
Në fillim të këtij muaji, zëvendësministri i Jashtëm i Moskës Sergej Ryabkov u pyet për mundësinë e dërgimit të trupave në Amerikën Latine dhe ai refuzoi të përjashtonte mundësinë. “Është stili amerikan që të ketë disa opsione për politikën e saj të jashtme dhe ushtarake,” tha ai. “Ky është gurthemeli i ndikimit të fuqishëm të atij vendi në botë.”
“Presidenti i Rusisë ka folur shumë herë mbi temën se cilat mund të jenë masat, për shembull që përfshin Marinën Ruse, nëse gjërat vendosen në drejtimin e provokimit të Rusisë dhe rritjes së mëtejshme të presionit ushtarak ndaj nesh nga SHBA-ja”. vazhdoi ai. “Ne nuk e duam këtë. Diplomatët duhet të arrijnë një marrëveshje”.
Këshilltari i Sigurisë Kombëtare i Shteteve të Bashkuara, Jake Sullivan, u përgjigj, duke vënë në dukje se aktiviteti ushtarak rus në Amerikën Latine nuk kishte qenë një pikë diskutimi në bisedimet e fundit të sigurisë, por tha se SHBA do të vepronte “me vendosmëri” nëse do të ndodhte.
Udhëheqësit nga Rusia dhe SHBA kanë zhvilluar negociata kohët e fundit për të tentuar të de-përshkallëzojnë situatën rreth Ukrainës, të cilën Uashingtoni e ka akuzuar Moskën se planifikon ta pushtojë. Kremlini ka mohuar se ka ndonjë qëllim agresiv dhe ka kërkuar garanci me shkrim se NATO, blloku ushtarak i udhëhequr nga SHBA, nuk do të zgjerohet në Ukrainë ose Gjeorgji, dy vende që ndajnë kufijtë me Rusinë.
