Presidenti i vendit Ilir Meta ka dekoruar sot mjekun e ndjerë neurolog, Drini Dobi me Dekoratën “Nënë Tereza”.
Gjatë fjalës së tij, në seremoninë e mbajtur në Presidencë ku morën pjesë edhe familjarë të mjekut të njohur, Meta e quajti Drini Dobin: “Shembull frymëzues i humanizmit, profesionalizmit dhe i sakrificës më sublime në shërbim të mbrojtjes së shëndetit dhe jetës”.
“Me mirënjohje për neurologun e shkëlqyer, pedagogun e Universiteti të Mjekësisë, shkencëtarin e punës së palodhur si dhe humanistin e përkushtuar dhe vetëmohues në shërbim të pacientëve. Në vlerësim të mjekut të rrallë, i cili iu dedikua me mish e me shpirt profesionit të tij fisnik, sidomos në situatat jashtëzakonisht të vështira të pandemisë Covid-19, duke sakrifikuar madje edhe jetën e tij në shërbim të pacientëve.” – tha Meta ndërsa u dorëzonte dekoratën familjarëve.
Kujtojmë se mjeku i njohur u nda nga jeta në dhjetor të vitit 2020, si pasojë e COVID-19. Ai ishte dërguar për kurim në Itali.
Kolegë brenda e jashtë vendit dhe gazetarë bënë thirrje asokohe për dhurim të hollash për mjekun neurolog, pasi gjendja e tij u rëndua si pasojë e koronavirusit, qeveria shqiptare gjithashtu njoftoi se do ta mbështeste financiarisht kurimin e neurologut, por fatkeqësisht Drini Dobi ndërroi jetë.
FJALA E METËS:
Të dashur familjarë të doktor Drini Dobi, të nderuar kolegë të tij, personalitete të fushës së mjekësisë dhe jo vetëm, të nderuar përfaqësues të qeverisë dhe institucioneve.
Jemi sot, për të vlerësuar një personalitet të mjekësisë sonë dhe një ikonë të bluzës së bardhë, mjekun e mirënjohur Drini Dobi.
Jo rastësisht, kemi vendosur ta bëjmë këtë vlerësim sot, në 27 janar, ditën e lindjes së tij, kur ai do të festonte ditëlindjen e 53-të. Por jemi pikërisht sot, për të dhënë mesazhin se, për një mjek dhe mbi të gjitha për një njeri me zemër të madhe, si Drini Dobi do të ketë vetëm ditëlindje.
E gjithë jeta e tij ishte në përkushtim të njerëzve, të pacientëve dhe ai, ishte gjithmonë një njeri i jashtëzakonshëm.
Nga miqtë e doktor Drinit, si doktor Gent Huta, kam mësuar se, ai ka qenë gjithmonë krenar për familjen e tij të bukur, për dy fëmijët, Davidin dhe Ersin dhe bashkëshorten e tij Floridën.
Se ka pasur plot miq të mirë dhe ka marrë shumë mirënjohje nga studentët e tij të Universitetit.
Se kishte arritur shumë objektiva të lidhura me punën, si Drejtues i Shërbimit të Strokut në Departamentin e Neuro-shkencës.
Se ndihej optimist për jetën, kultivonte gjithmonë pozitivitet dhe kënaqësi, duke qenë gjithmonë i dobishëm e duke dhënë gjithmonë mesazhet më optimiste për të ardhmen.
Do të kisha dashur shumë ta kisha pasur edhe unë, një mjek të afërt, si shumë prej jush, këtë doktor dhe njeri të mrekullueshëm.
Por jam i bindur, që do të vazhdoj ta njoh më tej në të ardhmen, përsëri përmes jush dhe shumë bashkëpunëtorëve të tjerë të tij, por edhe shumë qytetarëve që kanë përjetuar kujdesin dhe sakrificat që ai bënte për ta.
Nëse doktor Drini do të ishte ende fizikisht mes nesh, ai do vijonte t’i shërbente përmirësimit të jetës tonë, përmes asaj që dinte të bënte më mire, duke ju shërbyer njerëzve gjithmonë, me sakrificë të jashtëzakonshme, nëpërmjet modelit të tij ekselencës dhe përkushtimit
Ne, i jemi mirënjohës doktor Drini Dobit, por dhe gjithë mjekëve, infermierëve dhe personelit, që ka qenë në vijën e parë të përballimit me këtë COVID-19.
Nuk e kishte menduar më përpara, që do të jetonim në një kohë të tillë.
Sytë dhe shpresat tona janë të lidhura çdo ditë e më shumë, me mjekët, infermierët me gjithë sistemin e shëndetësinë, më shumë se asnjëherë më parë.
Humbja e çdo jete njerëzore, humbja e jetëve të mjekëve dhe infermierëve tanë, është një trishtim i madh për të gjithë ne.
Megjithatë ne jemi krenarë për mjekët tanë, jemi krenarë për të gjithë punonjësit e shëndetësisë, të cilët ashtu siç ishte doktor. Drini, të përkushtuar deri në fund, kanë dhënë një kontribut të madh, që të kishim sa më pak humbje dhe dhimbje njerëzorë gjatë kësaj pandemie të jashtëzakonshme.
Vlerësimi i sotëm për neurologun e shkëlqyer, Shefin e Shërbimit të Neurologjisë Vaskulare në Spitalin ‘Nënë Tereza’, pedagogun e Universitetit të Mjekësisë, shkencëtarin e punës së përulur e të palodhur, doktor Drini Dobi, është nderim për jetën dhe veprimtarinë e tij, është nderim për humanizmin dhe sakrificën e tij sublime.
Dekorata e lartë, që i akordojmë sot, doktor. Drini Dobit (pas vdekjes), mban emrin e shenjtores sonë dhe gjithë njerëzimit, Nënë Tereza, sepse dr. Drini, gjatë gjithë jetës së tij, ka vënë në jetë fjalët e saj të shenjta: ‘Folu butësisht njerëzve!
Tregoje mirësinë në fytyrë, në sy, në buzëqeshjen tënde, në ngrohtësinë e buzëqeshjes tënde!
Jep jo vetëm kujdesin, por edhe zemrën!
Prandaj ai do të jetë gjithmonë midis nesh dhe në radhë të parë, përmes fëmijëve të tij, të cilët jam i sigurt, do ta lartësojnë më tej emrin e tij duke u frymëzuar prej përkushtimit, profesionalizmit dhe humanizmit të babait të tyre”.
