NATO nuk do të zgjerohet duke e përfshirë Ukrainën në të ardhmen e afërt dhe për këtë arsye nuk ka kuptim as ta diskutojmë atë kur merret parasysh e ardhmja e sigurisë në Evropë, tha të enjten Ministrja e Jashtme gjermane Annalena Baerbock.
Duke folur për Westdeutsche Allgemeine Zeitung të Gjermanisë, kryediplomatja e Berlinit zbuloi se, gjatë udhëtimit të saj të fundit në Moskë, ajo kaloi një kohë të gjatë duke debatuar për Ukrainën me homologun e saj rus Sergej Lavrov dhe u përpoq ta bindte atë se të fliste për zgjerimin e NATO-s ishte humbje kohe.
Muajin e kaluar, Rusia publikoi dy projekttraktate që i kishte propozuar SHBA-së dhe NATO-s. Të dy dokumentet përfshinin një listë të gjatë garancish sigurie që synonin rritjen e stabilitetit në Evropë.
Ndër të tjera, Moska dëshiron që Brukseli të bjerë dakord të braktisë zgjerimin e NATO-s dhe të largojë trupat nga afërsia e kufirit rus.
Si përgjigje, si Uashingtoni ashtu edhe Brukseli zbuluan se do të ishin të lumtur të arrinin në një marrëveshje mbi vendosjen ushtarake dhe raketore, por përjashtuan një premtim ligjërisht të detyrueshëm për t’i dhënë fund zgjerimit të NATO-s në lindje.
