Deputeti i Partisë Demokratike Arbi Agalliu ka denoncuar në një deklaratë për mediet, abuzimin me tenderat e FSHZH.
Agalliu u shpreh se Fondi Shqiptar i Zhvillimit ka përzgjedhur ofertën me vlerë më të lartë në tenderin për shërbime konsulence ku parashikohet krijimi i një menuje tradicionale, rreth 15 mijë dollarë më shumë se ofertuesi më i lirë. E përpos kësaj, ka përzgjedhur si fituese kompaninë në pronësi të kuzhinierit të punësuar në restorantin e djalit të drejtorit të FSHZH-së, Dritan Agolli.
Deputeti demokrat shprehet se klientelizmi dhe konflikti i interesit mbizotërojnë mbi interesin publik.
“Ndërkohë që më shumë se gjysma e familjeve shqiptare jetojnë në kufirin e varfërisë, pushteti i korruptuar i Edi Ramës vijon të vjedhë dhe shpërdorjë paratë e qytetarëve.
I tillë është abuzimi më i fundit i Fondit Shqiptar të Zhvillimit.
Sipas dokumentacionit të publikuar në media, në tenderin për shërbime konsulence ku parashikohet krijimi i një menuje tradicionale me vlerë 500 milionë lekë, Fondi Shqiptar i Zhvillimit nuk ka përzgjedhur vetëm ofertën me vlerë më të lartë, rreth 15 mijë dollarë më shumë se ofertuesi më i lirë, por ka përzgjedhur si fituese kompaninë në pronësi të kuzhinierit të punësuar në restorantin e djalit të drejtorit të FSHZH-së, Dritan Agolli.
Pra, të nderuar qytetarë, nuk abuzohet vetëm me kostot marramendëse të një menuje prej 500 milionë lekësh, por edhe me barazinë në garë, ku si në traditën më të keqe të qeverisë Rama, klientelizimi dhe konflikti i interesit mbizotërojnë mbi interesin publik.”– tha Agalliu.
Lidhur me këtë tender, Agalliu ka kërkuar nisjen e një hetimi urgjent nga SPAK dhe të çohen para drejtësisë përgjegjësit e aferës korruptive.
“Ky shpërdorim me taksat e shqiptarëve kërkon një hetim të shpejtë nga drejtësia shqiptatre, vecanërisht kur abuzimi me tenderat ndodh në një kohë shumë të vështirë për vendin, i cili vuan krizën e korrupsionit, që po godet mirëqenien e e familjeve shqiptare.
SPAK duhet urgjentisht të hetojë këtë aferë korrupsioni dhe të çojë para drejtësisë ata që vjedhin paratë publike të taksapaguesve shqiptarë.
Edi Rama është i korruptuar.
Qeveria e tij është e korruptuar.
Me këta në krye, Shqipëria nuk mund të ketë zhvillim.
Shqiptarët duhet ta braktisin të shkuarën dhe të korruptuarit!”- tha deputeti demokrat.
