Kamionistët në Francë thuhet se po planifikojnë të imitojnë ‘Karvanin e Lirisë’ kanadeze duke mobilizuar mjete të shumta për të protestuar ndaj pasaportave të vaksinimit dhe kufizimeve të tjera Covid-19 të vendosura nga Parisi.
Sipas një raporti të BFM TV, demonstruesit planifikojnë të ‘paralizojnë’ kryeqytetin francez javën e ardhshme përpara se t’i bashkohen një ‘konvergjence më të gjerë evropiane’ në Bruksel.
Gazeta raportoi se në rrjetet e mediave sociale është shpërndarë një fletëpalosje që shpall ‘Karvanin e Lirisë Franca’, duke u bërë thirrje qytetarëve të ‘rimarrin lirinë e tyre, të drejtat e tyre themelore, qasjen e pakushtëzuar në kujdes, arsim dhe kulturë, respektimin e gjërave thelbësore, vlerat e Kushtetutës sonë’.
Pas përgatitjeve përfundimtare të hënën dhe të martën, kolona do të niset në tre valë nga e gjithë Franca, sipas një itinerari në fletëpalosje. Të tre valët pritet të arrijnë në kryeqytetin kombëtar mbrëmjen e së premtes. Të dielën, karvani është planifikuar të largohet dhe të ‘bashkohet me miqtë tanë evropianë’ në Bruksel.
Raporti i BFM TV vuri në dukje se një grup në Facebook, i quajtur ‘Le convoi de la liberte’ (Karvani i lirsë), ishte krijuar më 26 janar dhe arriti në afro 197,000 anëtarë. Gazeta tha se autokolona mund të ringjallë protestat kundër lejeve të vaksinimit, të cilat me sa duket kanë qenë të ndezura javët e fundit.
Përveç kësaj, raporti vuri në dukje një grup ‘Karvani Botëror i Lirisë’ që është krijuar në Telegram. Kjo mendohet të përfshijë demonstrues nga Gjermania, Italia dhe Kroacia, ndër të tjera. Gazeta e lajmeve Bruzz në Belgjikë raportoi të enjten se rreth 40,000 njerëz i ishin bashkuar grupit brenda javës së kaluar – me fokus në lirinë e fjalës dhe të drejtën për të bërë zgjedhjet e veta shëndetësore.
Sipas lajmeve të Bruzz, shoferët e kamionëve shpresojnë të nisen drejt kryeqyteteve të tyre përkatëse duke filluar nga e hëna përpara se të nisen për në Bruksel. Media vuri në dukje se ishte e paqartë se sa do të merrnin pjesë në të vërtetë, por shtoi se policia po monitoronte situatën.
