Presidenti kinez Xi Jinping ka bërë thirrje që talenti në fushën e ligjeve të kultivohet për t’u përfshirë në ‘luftë ndërkombëtare’ dhe për t’i rezistuar sanksioneve, duke thënë se juristët më të mirë dhe legjislacioni më i fortë nevojiten në fushën e punëve të jashtme.
Duke shkruar në revistën kryesore teorike të Partisë Komuniste, Xi shpalosi vizionin e tij për një ‘sundim ligjor socialist me karakteristika kineze’, duke rekomanduar reforma për sistemin ligjor të brendshëm të Kinës, si dhe mënyra për të përdorur ligjin për ‘luftë ndërkombëtare’.
“Ne duhet të ndjekim rregullin e përparësive të detyrave më urgjente, të forcojmë legjislacionin në lidhje me çështjet e jashtme dhe të plotësojmë më tej ligjet dhe rregulloret kundër sanksioneve, ndërhyrjeve dhe juridiksionit afatgjatë,” tha ai, duke bërë thirrje gjithashtu për ‘ndërtimin e ekipeve ligjore të specializuara’.
Presidenti theksoi se bota kishte ‘hyrë në një periudhë të trazuar’, duke shtuar se konkurrenca ndërkombëtare po shfaqet gjithnjë e më shumë në nivelin e ‘institucioneve, rregullave dhe ligjeve’.
Për këtë arsye, Pekini duhet të forcojë ‘ligjet dhe rregulloret e tij të lidhura me jashtë, të përmirësojë efikasitetin e zbatimit të ligjit dhe çështjeve gjyqësore të lidhura me jashtë, dhe të mbrojë me vendosmëri sovranitetin kombëtar’, tha ai.
Shtetet e Bashkuara, Britania e Madhe dhe Bashkimi Evropian kanë vendosur secila sanksione ndaj Kinës lidhur me shkeljet e dyshuara të të drejtave të njeriut në Hong Kong dhe kundër pakicave myslimane në provincën e saj Xinjiang, përfshirë Aktin e Parandalimit të Punës së Detyrueshme Ujgure të Uashingtonit, një ligj i miratuar në dhjetor që ndalon importet nga rajoni.
