Kryeqyteti i Tajlandës, Bangkoku, do ndryshojë emrin e tij zyrtar në anglisht në ‘Krung Thep Maha Nakhon’, njoftoi Zyra e Shoqërisë Mbretërore të vendit (ORST).
Krung Thep Maha Nakhon është emri i kryeqytetit në gjuhën tajlandeze, ndërsa emri anglez i qytetit ka qenë në përdorim zyrtar që nga viti 2001.
Ndryshimi ishte i nevojshëm për të pasqyruar më mirë ‘gjendjen e tanishme’, shpjegoi ORST. Emri ‘Bangkok’ vjen nga zona e vjetër e qytetit, e njohur si Bangkok Noi dhe Bangkok Yai, e cila tani përbën një pjesë të vogël të qytetit të stërmadh prej 50 distriktesh që strehon rreth 10.5 milionë njerëz.
Ndryshimi është miratuar në parim nga kabineti politik i vendit, megjithatë ai ende duhet të shqyrtohet nga një komitet i posaçëm qeveritar përpara se të hyjë në fuqi. Sidoqoftë, emri ‘Bangkok’ do njihet dhe do përdoret së bashku me emrin e ri zyrtar në gjuhën angleze.
Ndërsa emri i ri mund të duket mjaft i gjatë për anglishtfolësit, në fakt është një version shumë i shkurtuar i emrit ceremonial të kryeqytetit.
Emri i plotë i qytetit është ‘Krungthepmahanakhon Amonrattanakosin Mahintharayutthaya Mahadilokphop Noppharatratchathaniburirom Udomratchaniwetmahasathan Amonphimanawatansathit Sakkathattiyawitsanukamprasit’.
