Presidenti amerikan Biden e homologu i tij rus Putin kanë rënë dakord të dy në ‘parim’ për të mbajtur një takim për të ndalur përshkallëzimin e konfliktit në Ukrainë, tha Pallati Elysee në një deklaratë të dielën mbrëma.
Sipas deklaratës, Emmanuel Macron ‘propozoi që të mbahej një samit midis Presidentit Biden dhe Presidentit Putin dhe më pas me palët përkatëse të interesit për të diskutuar sigurinë dhe stabilitetin strategjik në Evropë’.
“Presidentët Biden dhe Putin e kanë pranuar të dy parimin e një samiti të tillë”, shtoi ai.
Megjithatë, një takim i tillë ‘mund të mbahet vetëm me kushtin që Rusia të mos pushtojë Ukrainën’, shtoi pallati Elysee.
‘Substanca’ e samitit, nëse do të zhvillohet, do të përgatitet nga ministri i Jashtëm rus Sergey Lavrov dhe Sekretari amerikan i Shtetit Antony Blinken gjatë takimit të tyre që pritet të enjten, më 24 shkurt.
Ndërsa Kremlini nuk ka dhënë ende një koment, sekretarja e shtypit e Shtëpisë së Bardhë Jen Psaki konfirmoi se Presidenti Biden ‘pranoi në parim një takim me Presidentin Putin pas angazhimit Blinken-Lavrov, nëse një pushtim nuk ka ndodhur’.
Presidenti francez e informoi homologun e tij amerikan të dielën në mbrëmje për bisedimet e tij me Putin e presidentin ukrainas Zelensky, në një telefonatë që thuhet se zgjati vetëm 15 minuta të dielën në mbrëmje.
Në një telefonatë me Putinin më herët të dielën, Macron ofroi të ndërmjetësonte bisedimet në të ashtuquajturin Formati i Normandisë ‘në orët e ardhshme’ për të siguruar një armëpushim përgjatë vijës së kontaktit në rajonin e diskutueshëm të Donbass në Ukrainën lindore. Kremlini konfirmoi se ‘dy udhëheqësit ranë dakord të mbajnë kontakte në nivele të ndryshme’, por nuk dha ndonjë hollësi specifike mbi plane të tilla.
Macron foli gjithashtu me Volodymyr Zelensky të Ukrainës, i cili thuhet se ‘konfirmoi vendosmërinë e tij për të mos reaguar ndaj provokimeve dhe për të respektuar armëpushimin’, sipas Pallatit Elysee.
