Kievi është i hapur për bisedime dypalëshe dhe shumëpalëshe për të zgjidhur krizën, ka thënë presidenti Volodymyr Zelensky, duke njoftuar një sërë masash për t’iu përgjigjur njohjes nga Rusia të dy republikave separatiste të Donbasit. Udhëheqësi ukrainas vuri në dukje se ai do të ndalonte mobilizimin e përgjithshëm për momentin.
“Për ne, nuk ka alternativë për t’i dhënë fund luftës,” tha Zelensky në një fjalim televiziv të martën në mbrëmje.
“Unë jam gati ta bëj këtë ose në një format dypalësh ose me pjesëmarrjen e liderëve të tjerë. Një nismë tashmë në zhvillim do të përfshijë anëtarë të përhershëm të Këshillit të Sigurimit të OKB-së, përfshirë Rusinë, si dhe Turqinë dhe Gjermaninë”, vuri në dukje presidenti ukrainas.
“Sot nuk ka nevojë për mobilizim të përgjithshëm”, tha Zelensky, duke trajtuar temën e mbrojtjes dhe sigurisë. Në vend të kësaj, ai ka urdhëruar thirrjen e rezervës operative, për një periudhë të kufizuar kohore, me qëllim rritjen e gatishmërisë së ushtrisë ukrainase.
Për të mbështetur ushtrinë, Ukraina ka nevojë për një ekonomi të fortë, argumentoi Zelensky, duke shpallur ‘një program patriotizmi ekonomik’. Ideja është që të nxitet prodhimi dhe industritë e tjera që të qëndrojnë në territorin ukrainas duke ulur taksat dhe duke zvogëluar inspektimet. Për të ulur çmimin e gazit dhe naftës, Kievi do ulë taksën e karburantit.
“Qëllimi ynë është të fitojmë pavarësinë ekonomike, veçanërisht në energji,” tha presidenti.
Zelensky u bëri thirrje të gjitha partive politike që të heqin dorë nga ambiciet e tyre ‘për hir të Ukrainës’ dhe të bashkohen me një lloj qeverie uniteti.
Presidenti falënderoi fuqitë e jashtme për mbështetjen e Kievit, duke filluar me presidentin turk Erdogan, atë amerikan Biden, kryeministrin britanik Johnson, kancelarin gjerman Scholz dhe kryeministrin kanadez Trudeau.
Fjalimi i Zelensky vjen pasi Rusia të hënën njohu rajonet separatiste Donetsk dhe Lugansk si shtete të pavarura. Ndërsa Putin nuk zbuloi nëse ndonjë trupë ruse tashmë është dërguar në republika, Kremlini specifikoi se ato njiheshin brenda kufijve të tyre si rajone ukrainase. Një pjesë e konsiderueshme e rajoneve të Donetskut dhe Luganskut aktualisht është ende nën kontrollin e Kievit.
