Një person është arrestuar në Kurbin ndërsa dy të tjerë janë shpallur në kërkim lidhur me një vjedhje të kryer në janar të këtij viti në fshatin Vinjollë.
Në pranga ka rënë 21-vjeçari me iniciale E.D. banues në Krujës ndërsa në kërkim janë shpallur 30-vjeçari Islam Kabili e 22-vjecari Gilmando Bami, të cilët dyshohet si bashkëpunëtorë të 21-vjeçarit.
Ngjarja ka ndodhur më 12 janar në banesën e shtetasit A.L. ku tre personat e lartpërmendur dyshohet se kanë vjedhur një shumë prej 1.5 milionë lekësh.
Njoftimi
“Kurbin – Finalizohet operacioni policor i koduar “Vinjolli”.
Zbardhet dhe dokumentohet ngjarja e ndodhur në janar 2022, në fshatin Vinjollë, ku 3 persona të maskuar, me anë të dhunës, kanë marrë 150.000 lekë të rinj në banesën e shtetasit A. L.
Vihet në pranga njëri nga autorët e dyshuar, shpallen në kërkim 2 të tjerët.
Në vijim të veprimeve hetimore për zbardhjen dhe dokumentimin e ngjarjeve të ndodhura më parë dhe vënien para përgjegjësisë ligjore të autorëve të dyshuar, specialistët për Hetimin e Krimeve në Komisariatin e Policisë Kurbin, duke vlerësuar çdo informacion dhe duke administruar çdo provë, nën drejtimin e Prokurorisë së Rrethit Gjyqësor Kurbin, kanë finalizuar operacionin “Vinjolli”.
Si rezultat i këtij operacioni është zbardhur ngjarja e ndodhur më datë 12.01.2022, në mesnatë, në fshatin Vinjollë, ku 3 persona të maskuar me uniforma kamuflazhi, me përdorimin e dhunës, kanë marrë në banesën e shtetasit A. L., shumën 150.000 lekë të rinj.
Bazuar në provat dhe informacionet e grumbulluara, janë identifikuar si autorë të dyshuar shtetasit E. D., 21 vjeç, banues në Krujë, i ndaluar gjatë operacionit, si dhe shtetasit Islam Kabili , 30 vjeç, banues në Krujë dhe Gilmando Bami, 22 vjeç, banues në Krujë, të cilët u shpallën në kërkim dhe punohet për kapjen e tyre.
Gjatë kontrollit të banesës së shtetasit Egli Durma, janë gjetur dhe sekuestruar në cilësinë e provës materiale, disa veshje të cilat dyshohen të jenë përdorur nga ky shtetas gjatë kryerjes së veprës penale.
Vijon puna hetimore pasi dyshohet se këta shtetas kanë kryer një sërë vjedhjesh të tjera.
Materialet procedurale iu referuan Prokurorisë së Rrethit Gjyqësor Kurbin, për veprime të mëtejshme hetimore, për veprën penale “Vjedhja me dhunë” kryer në bashkëpunim”.”
