Senatori amerikan Lindsey Graham ka bërë thirrje që presidenti rus Vladimir Putin duhet të vritet nga njerëzit e tij, duke sugjeruar se kjo do të ishte mënyra e vetme për t’i dhënë fund krizës në Ukrainë.
Graham e bëri këtë deklaratë për herë të parë gjatë një paraqitjeje në emisionin e Sean Hannity në “Fox News”. Më pas ai e përsëriti komentin në një postim në “Twitter”, duke përmendur edhe një referencë të tradhtarit të Julius Cezarit dhe arkitektit të një komploti të pasuksesshëm të vitit 1944 për të vrarë Adolf Hitlerin.
“A ka një Brutus në Rusi? A ka një kolonel Stauffenberg më të suksesshëm në ushtrinë ruse?”- pyeti ai. “E vetmja mënyrë se si kjo përfundon është që dikush në Rusi ta largojë këtë djalë. Ju do t’i bënit vendit tuaj dhe botës një shërbim të madh.”
Më pas në një postim tjetër në Twitter ai shtoi: “Të vetmit njerëz që mund ta rregullojnë këtë janë populli rus. Lehtë për t’u thënë, e vështirë për t’u bërë. Nëse nuk doni të jetoni në errësirë për pjesën tjetër të jetës tuaj, nëse nuk doni të jini të izoluar nga pjesa tjetër e botës në varfëri të tmerrshme dhe të jetoni në errësirë, ju duhet të ngriheni.”
Graham shërbeu për më shumë se tre dekada si avokat në Forcat Ajrore të SHBA-së, në detyrë aktive dhe më pas në rezervë. Ai shihet si një zë me ndikim brenda Partisë Republikane për çështjet ushtarake dhe të politikës së jashtme.
