SHBA ka rritur në mënyrë drastike dërgesat e saj të ndihmës ushtarake në Ukrainë që nga fundi i vitit të kaluar, duke përfshirë armë dhe pajisje për luftime urbane, raportoi Washington Post të shtunën, pasi kishte parë kontabilitetin e deklasifikuar për transfertat dhe shitjet.
Sipas dokumenteve të Pentagonit, që nga dhjetori Uashingtoni kishte pajisur në mënyrë aktive qeverinë e Kievit me armë të ndryshme, kostume speciale për asgjësimin e mjeteve shpërthyese dhe sende të tjera të dobishme për luftime në zonat urbane – kjo është më shumë se dy muaj përpara se të ndodhte pushtimi rus.
Gjatë javës së kaluar dërgesat e armëve amerikane në Ukrainë u shtuan më tej, me Kievin që mori për herë të parë sisteme raketore anti-ajrore Stinger, duke rritur arsenalin e tij të raketave antitank Javelin, ndër të tjera.
Lista ka ilustruar masën e madhe në të cilën administrata Biden ‘kërkoi të përgatiste ushtrinë ukrainase për të zhvilluar një luftë hibride kundër Rusisë’, shtoi Washington Post.
“Dorëzimi i armëve në Kiev është një proces i vazhdueshëm. Ne jemi gjithmonë duke parë se për çfarë ka nevojë Ukraina dhe ne e kemi bërë këtë prej vitesh tani”, ka thënë një zyrtar i paidentifikuar i mbrojtjes në SHBA, i cituar nga gazeta.
Pas sulmit rus, ‘ne sapo kemi përshpejtuar procesin tonë të identifikimit të kërkesave dhe kemi përshpejtuar konsultimet tona gjithashtu me ukrainasit, duke biseduar me ta çdo ditë, në krahasim me takimet periodike që bënim përpara kësaj krize’, shpjegoi ai.
