Gjiganti i lojërave video EA Sports ka hequr ekipet ruse nga seria e tij e njohur e lojërave të videove FIFA, ka konfirmuar kompania.
Komiteti Olimpik Ndërkombëtar (IOC) rekomandoi ndalimin e të gjithë atletëve rusë nga aktivitetet sportive ndërkombëtare në fillim të kësaj jave për shkak të konfliktit në Ukrainë.
Organet drejtuese të futbollit FIFA dhe UEFA janë ndër organizatat që ndjekin thirrjet e IOC-së dhe përjashtimi sportiv i Rusisë tani është shtrirë në lojërat video.
EA Sports njoftoi se do të heqë të gjitha ekipet ruse nga lojërat e saj të njohura FIFA, siç u komunikua në një deklaratë të mërkurën.
“EA Sports qëndron në solidaritet me popullin ukrainas dhe si shumë zëra në të gjithë botën e futbollit, bën thirrje për paqe dhe fundin e pushtimit të Ukrainës”, filloi deklarata.
“Në përputhje me partnerët tanë në FIFA dhe UEFA, EA Sports ka nisur proceset për të hequr kombëtaren ruse dhe të gjitha klubet ruse nga produktet e EA Sports FIFA duke përfshirë: FIFA 22, FIFA Mobile dhe FIFA Online. Ne po vlerësojmë gjithashtu në mënyrë aktive ndryshimet që lidhen me fushat e tjera të lojërave tona,” shtoi ai. “Ne do t’i mbajmë komunitetet tona të përditësuara për çdo veprim të ndërmarrë dhe falënderojmë lojtarët për durimin e tyre ndërsa punojmë me këto përditësime,” përfundoi EA Sports FIFA.
