Kryeministri britanik, Boris Johnson, ka paraqitur ‘planin’ e tij prej gjashtë pikash për Ukrainën, duke argumentuar se megjithëse ky ‘nuk është një konflikt i NATO-s’, komuniteti ndërkombëtar duhet të bëjë më shumë për të mbështetur Kievin ndërsa përballet me ‘agresionin rus’.
Moska nuk e konsideron sulmin e saj ndaj Ukrainës si një akt agresioni duke thënë se ‘operacioni i saj special ushtarak’ synon ‘çmilitarizimin dhe denazifikimin’ e Ukrainës, për të mbrojtur Donbasin dhe për të mbrojtur sigurinë e vetë Rusisë në mes të zgjerimit të NATO-s drejt lindjes.
Në një ese për The New York Times, botuar të dielën, Johnson tha se ‘akti i agresionit të Vladimir Putinit duhet të dështojë’.
“Ky nuk është një konflikt i NATO-s dhe nuk do të bëhet. Asnjë aleat nuk ka dërguar trupa luftarake në Ukrainë”, shkroi Johnson.
Kjo vërejtje vjen pas deklaratave të ngjashme të Sekretarit të Përgjithshëm të aleancës Jens Stoltenberg dhe kancelarit gjerman Olaf Scholz.
Johnson shtoi se kombet perëndimore ‘nuk kanë armiqësi ndaj popullit rus’ dhe ‘nuk kanë dëshirë të kundërshtojnë një komb të madh dhe një fuqi botërore’.
Megjithatë, kryeministri britanik argumenton se SHBA dhe Europa nuk kanë bërë mjaftueshëm për Ukrainën. Për më tepër, ai thotë se Perëndimi ka dështuar ‘të nxjerrë mësimet e agresionit rus’ dhe për një kohë të gjatë ka ‘kthyer faqen tjetër’.
Ai dha disa shembuj të agresionit rus duke përmendur konfliktin në Gjeorgji në 2008, ngjarjet në Ukrainë në 2014 dhe helmimin e dyshuar të Sergey Skripal dhe vajzës së tij Yulia në Salisbury në 2018.
Pika e parë e ‘planit të Johnson për Ukrainën’ është mobilizimi i një koalicioni humanitar ndërkombëtar me synimin për të vendosur një armëpushim të menjëhershëm dhe për t’u lejuar civilëve kalim të sigurt, ushqim dhe furnizime mjekësore.
Si pikë e dytë ai sugjeron një koordinim më të mirë të përpjekjeve për pajisjen e Ukrainës me pajisje mbrojtëse.
“Së treti, ne duhet të maksimizojmë presionin ekonomik mbi regjimin e z. Putin. Ne duhet të shkojmë më tej në sanksionet ekonomike, duke dëbuar çdo bankë ruse nga SËIFT dhe duke u dhënë agjencive tona të zbatimit të ligjit kompetenca të paprecedenta për të hequr fasadën e parave të pista ruse në Londër,” tha ai.
Johnson u bëri thirrje gjithashtu partnerëve që të parandalojnë çdo normalizim të asaj që bën Rusia në Ukrainë, duke argumentuar se ‘pushtimi rus në Gjeorgji’ në 2008 dhe ‘kapja e Krimesë’ në 2014 demonstrojnë se rezultatet e agresionit rus thjesht inkurajojnë më shumë agresion.
Perëndimi duhet të mbetet i hapur ndaj diplomacisë, por i takon Ukrainës që të marrë vendimet për çdo zgjidhje politike, tha Johnson.
Dhe në fund, kryeministri thekson se siguria euroatlantike duhet të forcohet. Kjo, sipas mendimit të tij, duhet të përfshijë jo vetëm forcimin e kufijve lindorë të NATO-s, por edhe mbështetjen e vendeve joanëtare të NATO-s që supozohet se përballen me rrezikun e agresionit rus.
