Çmimet e naftës së papërpunuar u rritën në nivelet më të larta që nga viti 2008 të hënën, mes frikës së ndalimit të importeve të naftës ruse për shkak të operacionit ushtarak të Moskës në Ukrainë, si dhe vonesave në bisedimet për një marrëveshje bërthamore me Iranin.
Siç shkruan RT, standardi global i naftës së papërpunuar Brent u rrit me 8.35 dollarë, ose 7.07%, në 126.46 dollarë për fuçi ndërsa standardi i papërpunuar i Teksasit West Texas Intermediate (ËTI) u rrit me 8.33 dollarë ose 7.2% në 124.01 dollarë.
Të dielën, të dy standardet tejkaluan pragun e 130 dollarëve për fuçi për herë të parë që nga korriku i vitit 2008 me Brent në 139.13 dollarë për fuçi dhe WTI në 130.50 dollarë. Çmimet e benzinës në SHBA pasuan rritjen e çmimeve të naftës së papërpunuar, duke u rritur me 11% gjatë javës së kaluar dhe duke kaluar 4 dollarë për herë të parë në pothuajse 14 vjet. Të paktën kështu tha të dielën ofruesi i çmimeve të benzinës në SHBA, GasBuddy.
Rritja e çmimeve vjen në mes të një bllokimi në bisedimet për rikthimin e marrëveshjes bërthamore të Iranit të vitit 2015, pas kërkesave të Rusisë për një garanci nga SHBA-të se sanksionet perëndimore nuk do të dëmtojnë tregtinë e Moskës me Teheranin.
Në përgjigje të Rusisë, Sekretari Amerikan i Shtetit Antony Blinken tha të dielën se sanksionet e vendosura ndaj Rusisë mbi Ukrainën nuk do të ndërhynin në një marrëveshje të mundshme bërthamore me Teheranin.
