Ekipi negociator i Rusisë tha të hënën se bisedimet me homologët e tyre ukrainas në Bjellorusi nuk arritën të përmbushnin pritshmëritë e tyre.
Megjithatë, ndërsa delegacioni rus paralajmëroi se një përparim për momentin mbetet një ‘iluzion’, të dyja palët thanë se ishte bërë njëfarë përparimi në vendosjen e rrugëve të evakuimit për civilët.
Delegacionet nga Moska dhe Kievi u takuan të hënën në Brest, Bjellorusi, për raundin e tretë të bisedimeve të paqes që synojnë zgjidhjen e konfliktit në vazhdim në Ukrainë.
Sipas negociatorit rus Vladimir Medinsky, pritshmëritë ‘nuk u materializuan’. Një tjetër anëtar i ekipit rus, Leonid Slutsky, tha se negociatat do të vazhdojnë.
Para fillimit të negociatave, zëdhënësi i Kremlinit Dmitry Peskov parashtroi kërkesat e Rusisë në një intervistë për Reuters.
Moska dëshiron që Ukraina të ndryshojë Kushtetutën e saj për të përjashtuar anëtarësimin në NATO, për të njohur Krimenë si territor rus dhe për të njohur pavarësinë e Republikave Popullore të Donetskut dhe Luganskut. Nëse Ukraina përmbush këto kushte, armiqësitë ‘do të ndalen në moment’, tha Peskov. Pala ukrainase deri më tani i ka hedhur poshtë këto kushte.
Pavarësisht bllokimit, të dyja palët njoftuan se ishte bërë përparim në ngritjen e korridoreve humanitare për të lejuar civilët të largohen nga zonat e luftimit. Përpjekjet për ta bërë këtë ditët e fundit dështuan, ku të dyja palët akuzuan njëra-tjetrën për prishje të armëpushimit.
