Në ditën e 17 të pushtimit rus të Ukrainës, civilët bënë përpjekje të reja për të ikur nga qytetet e rrethuara mes bombardimeve të rënda nga forcat ruse. Sipas BBC-së luftime intensive u raportuan në periferi të kryeqytetit, Kiev.
Disa korridore humanitare u propozuan për evakuimin e njerëzve nga zonat e sulmuara rëndë, duke përfshirë nga qyteti port jugor i Mariupolit, qyteti Sumy pranë kufirit rus dhe qytetet dhe fshatrat jashtë Kievit.
Inteligjenca britanike tha se pjesa më e madhe e forcave ruse tani ndodheshin brenda 25 kilometrave nga qendra e kryeqytetit dhe zyrtarët ukrainas thanë se kishin frikë se Moska po përgatitej të niste një sulm në shkallë të gjerë në Kiev.
Përpjekje të reja për të evakuuar qytetet
Herët të shtunën, Abdujalil Abdurasulov i BBC-së në Irpin, tha se ishte e vështirë të thuhej nëse armëpushimi i fundit humanitar po zbatohej sepse shpërthimet dhe zjarri i artilerisë, duke përfshirë këtu edhe nga pala ukrainase, mund të jenë dëgjuar aty pranë.
Disa nga ata të dëshpëruar për t’u larguar nga qyteti i Mariupolit, i cili ka mbetur me akses të kufizuar në ushqim, ujë dhe energji pas dy javësh bombardime, thanë se ishin të përgatitur të rrezikonin rreziqet e një evakuimi, sepse mendonin se nuk ishte më e sigurt të mbeten në qytet. Megjithatë, deri në mbrëmjen e së shtunës ndihma humanitare dhe autobusët e nevojshëm për evakuim nuk kishin mbërritur ende në qytet.
Zëvendëskryeministrja e Ukrainës Iryna Vereshchuk tha më vonë se rreth 13 mijë ukrainas ishin evakuuar përmes korridoreve humanitare të shtunën, por se askush nuk kishte arritur të largohej nga Mariupoli.
Zyrtarët ukrainas raportuan gjithashtu se shtatë civilë ishin vrarë një ditë më parë pasi trupat ruse qëlluan mbi një kolonë me gra dhe fëmijë që po largoheshin nga një fshat në veriperëndim të Kievit. Nuk ka pasur asnjë verifikim të pavarur mbi këtë sulm të supozuar dhe asnjë koment nga Moska.
Rusia bën paralajmërime për furnizimet me armë
Zëvendësministri i Jashtëm rus Sergei Ryabkov paralajmëroi se autokolonat perëndimore që dërgojnë armë në Ukrainë mund të shihen si “objektiva legjitime” për Forcat e Armatosura Ruse.
“Ne kemi paralajmëruar SHBA-në se pompimi i armëve në Ukrainë, të cilat ata i kanë orkestruar, nga një numër vendesh, nuk është vetëm një lëvizje e rrezikshme, por është një lëvizje që i kthen këto autokolona në objektiva legjitime.”– tha Ryabkov gjatë një daljeje televizive.
Ai tha se transferimi në Ukrainë i armëve të tilla si sistemet e mbrojtjes ajrore dhe raketat antitank ishte “i pamatur” dhe se SHBA duhet t’i merrte seriozisht paralajmërimet e Rusisë.
Zelensky njofton vdekjen e 1 mijë e 300 ushtarëve
Presidenti i Ukrainës, Volodymyr Zelensky, u tha gazetarëve se 1 mijë e 300 trupa ukrainase kishin vdekur në konflikt deri më tani dhe se rreth 500-600 trupa ruse u janë dorëzuar forcave ukrainase që nga e premtja.
Zelensky tha se një numër shumë më i madh i ushtarëve rusë ishin vrarë, por se ai nuk ishte i lumtur për asnjë nga vdekjet e raportuara.
“Nuk më jep gëzim që humbën 12 mijë njerëz, nuk më bën të lumtur… kjo nuk është mënyra se si unë e shoh botën.”– tha ai sipas BBC-së.
Protestat për rrëmbimin e kryebashkiakut
Ndërkohë banorët e Melitopol, një qytet i vogël në Ukrainën juglindore, dolën në rrugë për të protestuar kundër rrëmbimit të pretenduar të kryebashkiakut nga forcat ruse.
Të premten, zyrtarët ukrainas postuan një video ku sipas tyre tregohej Ivan Fedorov duke u larguar me sy të lidhur. Ata thanë se ai ishte tërhequr zvarrë nga zyra e tij me një çantë mbi kokë pasi kishte refuzuar të bashkëpunonte me trupat pushtuese ruse.
In Melitopol, defiant residents gathered near occupied district administration demanding that Russians release the kidnapped Melitopol mayor Ivan Fedorov – video by Odessa reg governor Maksym Marchenko pic.twitter.com/nCrE6OtQd0
— Myroslava Petsa (@myroslavapetsa) March 12, 2022
Masat për të mbrojtur “thesaret” e një qyteti
Në qytetin perëndimor të Lviv, një operacion i madh ka filluar për të mbrojtur artefaktet në qendrën e qytetit të listuar nga Unesco, duke përfshirë heqjen e qindra objekteve nga ekspozimi në muze.
Pothuajse çdonjë nga 1 mijë e 500 artefaktet e ekspozuara në Muzeun Kombëtar të Lviv – muzeu më i madh i artit në Ukrainë – tani janë zhvendosur.
Qyteti piktoresk kishte mbetur i paprekur, deri të dielën. Pushtimi rus i Ukrainës ka bërë që rreth 2.5 milionë ukrainas të ikin në vendet fqinje. Polonia thotë se më shumë se 1.6 milionë njerëz kanë ikur atje, ndërsa Moldavia thotë se ka arritur “kulmin” në aftësinë e saj për të përballuar refugjatët.
VINI RE: Ky artikull është pronë intelektuale e BBC/ Përshtati në shqip Hashtag.al
