Lëvizja e Moskës për të sanksionuar presidentin amerikan Joe Biden nuk do të thotë se Rusia refuzon të mbajë kontakte me Shtetet e Bashkuara. Kështu u tha gazetarëve të mërkurën zëdhënësi i Kremlinit, Dmitry Peskov.
“Këto sanksione nuk nënkuptojnë një refuzim për të mbajtur kontakte.”– vuri në dukje ai sipas TASS. “Kontaktet mund të rifillojnë nëse është e nevojshme.”– shtoi Peskov.
Ai tha gjithashtu se presidenti rus Vladimir Putin nuk kishte biseduar me homologun e tij amerikan pas nisjes së operacionit special ushtarak të Rusisë në Ukrainë.
Të martën, Ministria e Jashtme e Rusisë njoftoi sanksione kundër një numri zyrtarësh amerikanë. Në përgjigje të kufizimeve të ngjashme të paraqitura nga Uashingtoni, Moska vendosi një ndalim hyrje për presidentin e SHBA-ve Joe Biden dhe 12 zyrtarë të tjerë qeveritarë, duke përfshirë: Sekretarin e Shtetit Antony Blinken, Sekretarin e Mbrojtjes Lloyd Austin, Kryetarin e Shefave të Shtabit të Përbashkët Mark Milley, drejtorin e CIA-s William Burns, këshilltarin e Sigurisë Kombëtare Jake Sullivan, Sekretaren e Shtypit të Shtëpisë së Bardhë Jen Psaki dhe djalin e udhëheqësit amerikan, Hunter Biden.
Ministria e Jashtme ruse theksoi se Moska së shpejti do të zgjerojë listën e personave të ndaluar të hyjnë në Rusi.
