Ish-kandidati për drejtimin e PD-së, Ibsen Elezi ka shkruar në rrjetet sociale se grupimi afër Sali Berishës po eliminon primaret për të zgjedhur kryetarët e degëve.
Sipas tij nëpërmjet një urdhri të dalë së fundmi po shkelen vendimet e marra në Kuvendin e 11 dhjetorit të vitit të kaluar dhe po anashkalon liderin historik të PD-së Sali Berisha.
Elezi e mbështet argumentin e tij te afati i vënë në urdhër për paraqitjen e kandidaturave dhe garimin në një proces që parashikohet të zgjasë 1 javë.
Postimi i plotë:
Po eleminohen primaret!
Gara është zgjidhja, nëse nuk deformohet !
Vendimet e kuvendit të datës 11 dhjetor garantuan :
Garën e lirë,
Garën me primare,
Garën e barabartë,
Garën transparente.
Vetëm nje garë e tillë mund të shuaj konfliktet dhe të sjellë bashkimin e PD.
G29 ka detyrimin dhe përgjegjesinë para anëtarëve të PD dhe opinionit publik që të zbatojë vendimet kuvendit.
Shenjat e mungesës vullnetit nga G29, duken qartë që në udhëzimin Nr.5, të datës 11 mars 2022.
Udhëzimi nr.5 i sapo dale eleminon garën me primare në zgjedhjet për kryetarët e degëve, duke eleminuar kështu thelbin e demokracisë së brendëshme.
Kandidatët për kryetarë të degëve duhet të dorezojnë dokumentat deri në 3prill, ndërkohë që gara duhet të mbarojë në 10prill, gjë e cila praktikisht nuk lejon debatin mes kandidateve para antarësisë në grupseksione.
Kjo tregon se kjo garë do vazhdojë me stilin e vjeter, ku kandidatët garojnë pa zë dhe pa ide.
Pra, G29 po shkel vendimet e Kuvendit të datës 11 dhjetor, po anashkalon liderin historik Berisha duke u munduar të ulë imazhin e tij në sytë e demokratëve.
Ata po tregojnë se nuk mund të shkëputen nga modeli Rama-Basha i vrasjes së konkurencës.
Detyrë e çdo demokrati të mos lejojë shkeljen e vendimeve të kuvendit dhe të mbrojë garën.
