Dy persona janë arrestuar në Durrës pasi janë kapur në flagrancë duke vjedhur.
Në pranga ka rënë 45-vjeçari me iniciale D.K. i cili është kapur duke vjedhur 23 mijë lekë të reja në banesën e një personi me iniciale L.Ll. në Manzë.
Po kështu në pranga ka rënë edhe 44-vjeçar Xh.B. pasi ka vjedhur 220 mijë lekë të reja e disa dokumente në makinën e shteatasit me iniciale E.M.
Njoftimi
“Shërbimet e Policisë vijojnë punën për parandalimin e vjedhjeve, zbardhjen dhe dokumentimin e atyre të ndodhura më parë, kapjen dhe vënien e autorëve para përgjegjësisë penale. Falë ndërhyrjes në kohë të shërbimeve të Policisë u parandalua vjedhja e një shume parash, në një banesë, në Rrashbull, Durrës.
Arrestohen në flagrancë 2 shtetas. Nga specialistët për Hetimin e Krimit në Postën e Policisë Manzë u arrestua në flagrancë shtetasi D. K., 45 vjeç, banues në Rrashbull, Durrës, pasi është kapur në flagrancë nga shërbimet e Policisë, në tentativë për të vjedhur në banesën e shtetasit L. Ll., shumën e parave 23.000 lekë të rinj, e cila u sekuestrua në cilësinë e provës materiale. Gjithashtu, nga specialistët për Hetimin e Krimit në Komisariatin e Durrësit u bë arrestimi në flagrancë i shtetasit:
Xh. B., 44 vjeç, banues në lagjen nr. 17, Durrës, pasi ka vjedhur në automjetin e shtetasit E. M., një çantë me 220.000 lekë të rinj dhe disa dokumente. Duke marrë shkas nga vjedhjet e ndodhura ditët e fundit, për zbardhjen e të cilave u zhvillua operacioni “Seriali”, Policia e Durrësit i bën thirrje qytetarëve që të denoncojnë çdo rast të vjedhjes së pronës dhe pasurisë së tyre, duke u garantuar se do t’u vijë në ndihmë në çdo kohë.”
