Kryeministri bullgar Kiril Petkov
Deputetët në Bullgari kanë mbështetur një vendim për t’i dhënë fund lëshimit të diskutueshëm të të ashtuquajturave “pasaporta të arta”.
Ligjvënësit votuan pro dy amendamenteve që do të pengojnë të huajt të marrin nënshtetësinë e BE-së në këmbim të investimeve të mëdha.
Bashkimi Evropian ka dënuar sërish lëshimin e “pasaportave të arta” pas pushtimit të Ukrainës nga Rusia.
Skemat janë kritikuar prej kohësh për lidhje me korrupsionin dhe pastrimin e parave.
Që nga viti 2013, shtetasit e huaj të pasur mund të investojnë një milion levë (511,000 €) në Bullgari për të marrë një qëndrim të përhershëm. Ata gjithashtu mund të marrin nënshtetësinë bullgare për një investim tjetër prej 511,000 €.
Por qeveria e re bullgare, e cila ishte zotuar të çrrënjosë korrupsionin, njoftoi synimin e saj për të shfuqizuar skemën e “pasaportës së artë”.
Pavarësisht amendamenteve të reja, shtetasit e huaj mund të merrnin ende leje qëndrimi në këmbim të investimeve.
Por agjencia bullgare e sigurisë do të hetojë tani qytetarët që kanë marrë tashmë të drejtën e qëndrimit ose të shtetësisë.
Më shumë se 130,000 njerëz besohet se kanë përfituar nga “pasaportat e arta” të BE-së midis 2011 dhe 2019, në këmbim të investimeve mbi 21.8 miliardë euro.
Në Bullgari, mbi 100 të huaj, kryesisht nga Rusia, Kina dhe Lindja e Mesme, kishin marrë një “pasaportë të artë” që nga viti 2013.
Në fillim të këtij muaji, qeveria malteze njoftoi se do të pezullonte “pasaportat e arta” për shtetasit rusë dhe bjellorusë.
