Presidenti i Bjellorusisë, Alexander Lukashenko, ka përsëritur për gazetarët se autoritetet bjelloruse nuk kanë “plane për të luftuar në Ukrainë” dhe u bëri thirrje për një përgjigje të qetë ndaj lajmeve të rreme mbi këtë temë.
“Unë kam thënë një mijë e njëzet herë se ne nuk kemi plane të luftojmë në Ukrainë. Por çështja është e nxehtë. Bjellorusët nuk e tolerojnë luftën në nivel gjenetik. Prandaj ajo ka filluar të shfrytëzohet. Ne duhet të përgjigjemi në një mënyrë e bukur. Dikur ishte e arsyeshme në kohët sovjetike të flitej jo vetëm për propagandë, por edhe për kundërpropagandë. Kështu që ne duhet të përgjigjemi me qetësi, por jo të kërkojmë justifikime.”- citohet të ketë thënë Lukashenko, sipas TASS.
Presidenti bjellorus qortoi opozitën, e cila kishte ikur në Perëndim, për ndikim psikologjik te njerëzit duke pretenduar se ushtria bjelloruse do të merrte pjesë në operacionet luftarake në vendin fqinj. Përveç kësaj, ai tha se aktivistët e opozitës po krijonin njësi vullnetare për të luftuar në Ukrainë.
“Pra, kush po lufton në fakt tani në Ukrainë?”- pyeti Lukashenko në mënyrë retorike.
Presidenti bjellorus beson se pretendimet nga jashtë për planet e Bjellorusisë për t’u bashkuar në luftimet që po bëhen në vendin fqinj janë transmetuar me qëllim.
“Kështu, po përgatitet opinioni publik për të na përfshirë në të.”- shprehet i bindur Lukashenko.
“Ne mund të tërhiqemi zvarrë në luftë në një mënyrë: në rast se bëhet agresion kundër nesh, në rast se ata hyjnë në luftë kundër nesh. Prandaj i mbaj sytë hapur.”- tha presidenti bjellorus.
