Prokuroria e Posaçme kundër Korrupsionit dhe Krimit të Organizuar (SPAK) ka publikuar një njoftim zyrtar për ekzekutimin e vendimit të Gjykatës së Posaçme nga Policia e Shtetit për arrestimin e ish-deputetit të PS-së Alqi Bllako.
Sipas njoftimit të SPAK-ut, urdhri për arrestimin e Bllakos i është dhënë Policisë dje në orën 15:45, por ky vendim është ekzekutuar nga Policia e Shtetit vetëm në orën 03:30 të mëngjesit të sotëm.
Ky njoftim duket sikur nxjerr blof Policinë e Shtetit e cila përmes një njoftimi mëngjesin e sotëm tentoi të hidhte poshtë raportimet e medieve mbi Bllakon, se uniformat blu kishin shkuar për ta arrestuar por s’e kishin gjetur në banesë.
Policia thoshte se përkundër raportimeve në medie, Bllako në fakt ndodhej i ndaluar në Drejtorinë e Policisë Tiranë që prej mbrëmjes së kaluar. Edhe pse nuk jepte një orar mbi arrestimin/vetëdorëzimin e tij linte të kuptohej se ai ishte vetëdorëzuar mbrëmë.
“Drejtoria e Përgjithshme e Policisë së Shtetit, informon publikun se përkundër disa lajmeve të rreme mbi arratisjen e shtetasit Alqi Bllako, ky shtetas ndodhet në Drejtorinë Vendore të Policisë Tiranë që prej mbrëmjes së djeshme.
Sqarojmë se shtetasi Alqi Bllako është vetëdorëzuar konform detyrimit ligjor për zbatimin e masës së sigurisë “Arrest në burg”, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar.”– thuhej në njoftimin e Policisë. Por njoftimi i SPAK konfirmon se Bllako pas hekurave është vënë vetëm sot, herët në mëngjes.
Një njoftimin për mediet, SPAK jep kronologjinë e plotë që nga dhënia e autorizimit për arrestimin e deputetit Alqi Bllako, urdhri i arrestimit të tij nga Gjykata dhe ekzekutimi i këtij vendimi.
Vlen të theksohet se SPAK bën të ditur gjithashtu se dy ditë më parë, më 30 mars i është kërkuar Drejtorisë së Përgjithshme të Policisë mbajtja nën mbikëqyrje e Bllakos.
NJOFTIMI I PLOTË I SPAK-ut
Mbi caktimin dhe ekzekutimin e masës e sigurimit për shtetasin Alqi Bllako
Në kuadër të hetimeve të procedimit penal nr.187 të vitit 2020, në Regjistrin e Njoftimit të Veprave Penale në Prokurorinë e Posaçme me datë 18.03.2022, është regjistruar emri i shtetasit Alqi Bllako, lindur në Ersekë dhe banues në Tiranë, si i dyshuar për kryerjen e veprave penale “Shpërdorimi i detyrës”, në bashkëpunim dhe “Korrupsioni pasiv i funksionarëve të lartë shtetërorë ose i të zgjedhurve vendorë”, të parashikuara nga nenet 248, 25 dhe 260 të Kodit Penal.
Me shkresën Nr.2407 Prot., datë 29.03.2022, Drejtuesi i Prokurorisë së Posaçme i ka kërkuar Kuvendit të Republikës së Shqipërisë dhënien e autorizimit për arrestimin e deputetit Alqi Bllako. Kërkesa është shoqëruar me dokumentacionin përkatës.
Me shkresën Nr.1274/4 Prot., datë 29.03.2022, ardhur nga Kuvendi, jemi njoftuar se kërkesa për dhënie autorizimi për arrestimin e deputetit Alqi Bllako do të shqyrtohet në mbledhjen e Këshillit për Rregulloren, Mandatet dhe Imunitetin, që do zhvillohet me datë 30.03.2022, ora 18.00.
Me shkresën Nr.2407/4 Prot., datë 30.03.2022 kemi njoftuar Drejtorinë e Përgjithshme të Policisë në lidhje me kërkesën e paraqitur në Kuvend për dhënie autorizimi për arrestimin e deputetit Alqi Bllako, duke i kërkuar mbajtjen nën mbikqyrje të deputetit dhe njoftimin e prokurorit të çështjes nëse deputeti do paraqitej në dalje të territorit të Republikës së Shqipërisë.
Kuvendi i Republikës së Shqipërisë, me shkresën Nr.1274/7 Prot., datë 30.03.2022 (ardhur në Prokurorinë e Posaçme në orën 19.40) na ka njoftuar për anulimin e mbledhjes së Këshillit për Rregullore, Mandatet dhe Imunitetin, për arsye se deputeti ka depozituar kërkesën për heqje dorë nga mandati deputetit. Neni 71, pika 2, shkronja “b” e Kushtetutës parashikon se: “…mandati deputetit mbaron kur deputeti heq dorë nga mandati…”.
Me shkresën 2407/6 prot., datë 30.03.2022 (dorëzuar në gjykatë në orën 20.30) nga Prokuroria e Posaçme i është kërkuar Gjykatës së Shkallës së Parë për Korrupsionin dhe Krimin e Organizuar caktimi i masës së sigurimit personal “arrest në burg”, për shtetasin Alqi Bllako, si i dyshuar për kryerjen e veprave penale të parashikuara nga nenet 248, 25 dhe 260 të Kodit Penal.
Me vendimin Nr.26, datë 31.03.2022, Gjykata e Shkallës së Parë për Korrupsionin dhe Krimin e Organizuar ka caktuar masën e sigurimit personal “arrest në burg”, për shtetasin Alqi Bllako. Vendimi është vënë në dispozicion të Prokurorisë së Posaçme në orën 15.30 të datës 31.03.2022.
Në orën 15.45, të datës 31.03.2022, vendimi i gjykatës për caktimin e masës së sigurimit ndaj shtetasit Alqi Bllako i është dhënë për ekzekutim strukturave të Policisë së Shtetit. Vendimi është ekzekutuar nga Policia e Shtetit në orën 03.30 të datës 01.04.2022.
