Për fundjavën çmimi i tregtimit të vajit të lulediellit me shumicë do të vijojë të jetë 315 lekë dhe për shitjet me pakicë 321 lekë për litër.
Bordi përcaktoi javën e kaluar marzh fitimi 2 lekë për grosistët dhe 4 lekë për supermarketet, ndërsa mbledhja e parashikuar ditën e premte nuk u zhvillua.
Por mosndjekja me rigorozitet çmimeve në tregjet e huaja po shkakton humbje te shitjet për importuesit e vajit të lulediellit.
Çmimet e shitjes si nga subjektet e shumicës dhe pakicës kanë mbetur të pandryshuara edhe për miellin, sheqerin dhe orizin.
Tregtarë të vajit të ambalazhuar pohuan për “Monitor” se aktualisht çmimi i shitjes të vajit në tregjet e huaja duke përfshirë edhe koston e taksave dhe transportit është 380 lekë deri 420 lekë për litër.
“Furnizimet e reja me çmimet e shtrenjtuara dhe mosrishikimi i tyre nga bordi i transparencës ka ulur shitjet. Shumë tregtarë për këtë pjesë të furnizimit të siguruar me çmim më të lartë, kanë ndërprerë shitjet, pasi malli duhet të shitet nën kosto. Por në këtë situatë humbjet janë më të larta nga mosshitja e mallit, sesa nga shitja e tij me çmimet aktuale të vendosura në treg. Vaji i lulediellit përveç se po blihet shumë shtrenjtë, mezi arrihet të sigurohen furnizimet, por po hasim vështirësi e dhe në transportin e tij”, thekson një nga importuesit.
Importuesit e vajit të lulediellit kanë paralajmëruar se nga muaji maj dhe përgjatë stinës të verës furnizimet me vajin e lulediellit në treg do të jenë të pakta deri në mungesë, për shkak të rënies të ofertës në tregjet europiane pas intensifikimit të krizës Rusi-Ukrainë.
Aktualisht përveç çmimit të shtrenjtë tregtarët e vajit të ambalazhuar po përballen me mungesën e gjetjes të transportit rrugor për të sjellë furnizimet e tyre. bllokimi i kontejnerëve të transportit me anije nga Deti i Zi, për shkak të luftës Ukrainë -Rusi, ka rritur fluksin e transportit rrugor me kamionë. Kërkesa e lartë përveç se ka dyfishuar çmimet minimale edhe ka pamundësuar gjetjen e mjeteve.
Pas nisjes të luftës, në tregun e shitjes me pakicë vaji i lulediellit ka pësuar rritjen më të lartë të çmimit në produktet e shportës ushqimore. Në muajin mars çmimi i vajit të lulediellit u tregtua 330 lekë për litër nga 249 lekë për litër që ishte në muajin shkurt (32,5% rritje).
Pas kësaj periudhë çmimi u rrit edhe rreth 9% dhe arriti 370 lekë për litër. Ndërsa 2 javët e fundit të muajit mars bordi i transparencës uli çmimin e shitjes të vajit ushqimor në 305 lekë me pakicë. Nga 1 prilli në mbledhjen e fundit të mbajtur nga bordi çmimi për tregtarët e pakicës u rrit në 321 lekë për litër./D.Azo
VINI RE: Ky material është pronësi intelektuale e Monitor
