Një 59-vjeçar në Gjirokastër është vënë në pranga, pasi akuzohet për zjarrëvënie. Bëhet fjalë për shtetasin me inicialet I. M., banues në fshatin Plesat në Gjirokastër.
Ai akuzohet se ndezi zjarr në pronë shtetërore me qëllim hapjen e kullotave.
“Specialistët për Hetimin e Krimeve të Komisariatit të Policisë Gjirokastër, në vijim të punës për identifikimin dhe vënien para përgjegjësisë ligjore të autorëve të zjarrvënieve, arrestuan në flagrancë shtetasin I. M., 59 vjeç, banues në fshatin Plesat, Gjirokastër, për veprën penale ‘Shkatërrimi i pronës me zjarr’.
Ky shtetas u arrestua në flagrancë, pasi ka ndezur zjarr në pronë shtetërore, në vendin e quajtur ‘Kulla’, në fshatin Plesat, Gjirokastër dhe për pasojë është djegur një sipërfaqe toke me bimësi të egra.
Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.”- thuhet në njoftimin e Policisë.
