Policia ka arrestuar një përmbarues privat në Tiranë, i cili akuzohet për shpërdorim detyre.
Sipas uniformave blu 54-vjeccari Fatos Alimadhi, gjatë ushtrimit të funksionit si përmbarues privat, ka firmosur shkresa dhe vendime për sekuestro për bllokimin e llogarive rrjedhëse të një subjekti privat, pa e njoftuar këtë subjekt.
Historia ishte kjo: një shtetas kishte marrë kredi në emër të një subjekti dhe pas disa kohësh kishte ndërruar jetë, ndërsa përmbaruesi privat i kishte bllokuar llogaritë familjarëve të të ndjerit, pa lajmëruar. Por sipas ligjit, në momentin që ndërron jetë kredinë e mbulon siguracioni i jetës.
Në kuadër të këtij operacioni u proceduan penalisht në gjendje të lirë edhe shtetasit me inicialet: S. D., dhe P. Q., me detyrë përmbarues privat, për të njëjtën vepër penale.
Njoftimi i plotë:
Finalizohet me sukses operacioni policor i koduar “Account”.
Operacioni, i zhvilluar nga Sektori për Hetimin e Krimit Ekonomik dhe Financiar në DVP Tiranë
Vihet në pranga 1 shtetas, për veprën penale “Shpërdorimi i detyrës”.
Procedohen penalisht 2 të tjerë.
Specialistët e Sektorit për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë, organizuan dhe finalizuan me sukses operacionin policor të koduar “Account”, si rezultat i të cilit u bë ndalimi i shtetasit:
– F. A., 54 vjeç, banues në Tiranë, për veprën penale “Shpërdorimi i detyrës”.
Nga veprimet hetimore ka rezultuar se shtetasi F. A., gjatë ushtrimit të funksionit si përmbarues privat, duke shpërdoruar detyrën, ka firmosur shkresa dhe vendime për sekuestro për bllokimin e llogarive rrjedhëse të një subjekti privat, pa e njoftuar këtë subjekt.
Gjithashtu, në kuadër të këtij operacioni, u proceduan penalisht në gjendje të lirë shtetasit S. D., dhe P. Q., me detyrë përmbarues privat, për veprën penale “Shpërdorimi i detyrës”.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
