Javë pasi bleu naftën ruse me zbritje, India po vendos për një rritje të madhe në blerjet e saj të qymyrit nga vendi i sanksionuar. Ekonomia e gjashtë më e madhe në botë është e fokusuar në sigurinë e saj energjetike, duke shpërfillur përpjekjet e SHBA-së dhe aleatëve të saj për të izoluar Moskën.
Në mars, importet e qymyrit të Indisë nga Rusia thuhet se u rritën në nivelin më të lartë të dy viteve. Vendi aziatik bleu 1.04 milion ton qymyr rus, sasia më e lartë që nga janari i vitit 2020, sipas Mattheë Boyle, analist kryesor në kompaninë e inteligjencës së mallrave Kpler, siç citohet nga CNBC.
Javën e kaluar, presidenti amerikan Joe Biden nënshkroi një urdhër ekzekutiv që ndalon importin e qymyrit rus së bashku me naftën bruto, benzinën, produktet e naftës, vajrat dhe gazin e lëngshëm, si pjesë e një grupi të ri ndëshkimesh kundër Moskës për operacionin e saj ushtarak në Ukrainë.
Më vonë, Komisioni Evropian propozoi ndalimin e importeve ruse të energjisë, duke përfshirë qymyrin. Megjithatë, politikëbërësit e bllokut nuk kanë arritur të bien dakord për një paketë të re sanksionesh.
“Tregjet dyshojnë se India dhe Kina mund të rrisin importet e qymyrit nga Rusia, duke kompensuar disa nga ndikimet e një ndalimi zyrtar të BE-së për importet e qymyrit rus.” – tha për mediat Vivek Dhar, drejtor i kërkimit të mallrave të minierave dhe energjisë në ‘Commonëealth Bank of Australia’.
Javën e kaluar, ministri i Çelikut i Indisë Ramchandra Prasad Singh tha se vendi po kërkon të dyfishojë importet e qymyrit koks rus, një përbërës jetik për prodhimin e çelikut. Singh shtoi se India kishte importuar 4.5 milionë tonë, por nuk tregoi periudhën të cilës i referohej.
Qymyri përbën gati 70% të prodhimit të energjisë elektrike në Indi, sipas perspektivës së Agjencisë Ndërkombëtare të Energjisë për vitin 2021. Vendi renditet si konsumatori dhe importuesi i dytë më i madh në botë i qymyrit, pas Kinës. Vitin e kaluar, India u godit nga një mungesë qymyri mes rritjes së kërkesës për energji pas pandemisë.
Rusia është prodhuesi i gjashtë më i madh i qymyrit në botë. Në vitin 2020, 54% e eksporteve të qymyrit të vendit thuhet se shkuan në Azi, ndërsa rreth 31% shkuan në Evropë.
“Pavarësisht paralajmërimeve nga Perëndimi, India vazhdon të anojë në marrëdhëniet e saj të zinxhirit të furnizimit nga Rusia për burimet natyrore si nafta dhe qymyri.” – shpjegoi Samir N. Kapadia, kreu i tregtisë në firmën konsulente për marrëdhëniet me qeverinë ‘Vogel Group’.
