Sulmohet përsëri policia në Kosovë në zonat kufitare me Serbinë. Policia e Kosovës ka njoftuar se sot në orët e para të mëngjesit kanë ndodhur dy shpërthime në Sharpej të Jarinjës.
Shpërthimet kanë ndodhur afër një mjeti të policisë që ishte i ndaluar, ndërsa efektivët ishin e përqendruar në parandalim të kontrabandës në atë zonë.
Dyshimet janë se mjetet piroteknike janë hedhur nga territori i Serbisë. Për fat të mirë, nuk ka të lënduar nga ky incident.
“Sot, më 16.04.2022, rreth orës 03:10, në Sharpej të Jarinjës, kanë ndodhur dy shpërthime (dyshohet nga mjete piroteknike). Shpërthimet kanë ndodhur afër veturës së policisë e cila ishte në një pikë statike ku policia ishte e përqendruar në parandalim të kontrabandës në atë zonë.
Nga shikimi i vendit të ngjarjes është vërejtur se në xhamin e veturës policore ka mbetur një copë letre (dyshohet mbështjellës i mjeteve piroteknike). Ngjarja ka ndodhur në një pjesë që është afër territorit të Serbisë dhe dyshimi i bazuar është se këto mjete janë hedhur nga territori i Serbisë. Policia ka qenë duke monitoruar një rrugë ilegale të mbyllur kohë më parë dhe e cila përdorej për kontrabandë të mallrave.
Nga ky rast, nuk ka persona të lënduar as dëme materiale. Policia është duke e trajtuar rastin dhe do të vazhdojë aktivitete operative për të parandaluar aktet kriminale trans-kufitare në atë zonë dhe ofrimin e sigurisë për të gjithë.”- thuhet në njoftimin e Policisë.
Ky është sulmi i pestë ndaj policisë së Kosovës brenda katër ditësh.
