Kina tani ka tre qytete me numrin më të madh të miliarderëve në botë, tregojnë të dhënat nga Global Rich List, një renditje vjetore e përgatitur nga firma kërkimore ‘Hurun Report’ me bazë në Shangai.
Numri më i madh i miliarderëve, 144, jetojnë në Pekin, i ndjekur nga Shangai me 121. Nju Jorku dikur zinte vendin e tretë me 110, por së fundmi u tejkalua nga Shenzhen, një ish-fshat peshkimi që u kthye në ‘Silicon Valley’ të Kinës, me 113 më të pasurit të globit. Qyteti ka pasur një përqendrim në rritje të pasurisë, duke shtuar tetë miliarderë në listën e tij që nga viti i kaluar.
Sipas Heng Chen, një profesor i asociuar i ekonomisë në Universitetin e Hong Kongut, ngritja e Shenzhen buroi nga përpjekjet e tij për ta bërë qytetin mikpritës për bizneset, për shembull, duke ofruar lehtësira tatimore për kompanitë e teknologjisë së lartë.
“Struktura e popullsisë është ende shumë e re në krahasim me super qytetet e tjera ose qytetet e nivelit të parë në Kinë, kështu që kjo është një nga arsyet pse është një vend shumë tërheqës.” – tha ai, duke shtuar se autoritetet e Shenzhen ‘angazhohen shumë për të tërhequr talentet më të mirë nga pjesa tjetër e botës’.
Shenzhen filloi të rritet me shpejtësi në vitin 1980, pasi iu dhanë të drejtat e zonës së parë speciale ekonomike të Kinës, e cila i lejoi qytetit të tërheqë investime të huaja. Si rezultat, PBB-ja e saj u rrit nga më pak se 28 milionë dollarë në afërsisht 475 miliardë dollarë në 4 dekadat e fundit.
Qyteti pret një numër të firmave të mëdha teknologjike të Kinës, duke përfshirë Huawei dhe Tencent, të cilat analistët thonë se tërheqin emra të tjerë të mëdhenj. Në vitin 2021, rreth 2,500 kompani të reja të teknologjisë së lartë u krijuan në Shenzhen, duke e bërë totalin e tyre rreth 17,000, sipas të dhënave të qeverisjes vendore.
Hurun Report thotë se kishte 3,381 miliarderë në botë që nga 14 janari, 153 më shumë se një vit më parë, me 1,133 prej tyre që jetonin në Kinë. Zhong Shanshan, themeluesi i kompanisë së pijeve ‘Nongfu Spring’, është personi më i pasur i Kinës me një vlerë neto prej 72 miliardë dollarësh.
Themeluesi i ByteDance (pronari i TikTok), Zhang Yiming, është i dyti me 54 miliardë dollarë dhe Zeng Yuqun, kreu i prodhuesit të baterive të automjeteve elektrike CATL është i treti me 53 miliardë dollarë.
Megjithatë, nuk ka miliarderë kinezë në listën e top 10-sheve botërore dhe CEO i Tesla dhe SpaceX, Elon Musk, me një vlerë neto prej më shumë se 200 miliardë dollarë, mbetet personi më i pasur në botë.
