Thirrjet ‘Allahu Akbar’, makinat e policisë të djegura dhe oficerët e plagosur, kjo ishte pamja si dukej festa e Pashkëve në shumë qytete anembanë Suedisë këtë javë, pasi autoritetet lejuan një grup të ekstremit të djathtë kundër imigracionit të organizonte mitingje, të cilat përfshinin planet për djegien e Kuranit.
Trazirat shpërthyen të enjten në qytetin e Linkoping, ku bandat e të rinjve u përleshën me policinë, duke plagosur tre oficerë. Të paktën dy persona u arrestuan.
Dhuna u ndez nga vendimi i autoriteteve suedeze për të dhënë leje për një seri mitingjesh antiislame. Organizuar nga Rasmus Paludan – një politikan danez i krahut të djathtë, i cili ka kaluar kohë në burg për akuza të lidhura me racizmin – ngjarjet në vende të ndryshme anembanë Suedisë kishin për qëllim të shfaqnin djegien e librit të shenjtë të Islamit, Kuranit.
Tensionet arritën në krye të premten kur protesta zbriti në qytetin e Orebro.
Ndërsa Paludan dhe mbështetësit e tij fillimisht u lejuan të mbanin tubimin e tyre, ai përfundimisht duhej të shpërndahej për shkak të shqetësimeve të sigurisë. Turmat e rebelëve që protestonin kundër grupit të ekstremit të djathtë qëlluan me gurë policinë dhe dogjën katër automjete të policisë.
Ndërsa departamenti i policisë lokale fillimisht foli për katër oficerë të plagosur dhe një kalimtar të rastit, më vonë e përditësoi atë numër, duke thënë se ‘rreth dhjetë policë’ kishin pësuar lëndime.
Skena të ngjashme u panë në kryeqytetin e Suedisë, Stokholm, si dhe në Malmo dhe Norrkoping.
Sipas gazetës Expressen, Paludan arriti të digjte të paktën një kopje të Kuranit në lagjen Rinkeby të Stokholmit të premten. Një video është postuar edhe në Tëitter, e cila duket se e tregon atë duke kryer veprimin.
Shfaqjet antiislame të Paludanit dhe trazirat pasuese erdhën përpara Pashkëve dhe gjatë muajit të Ramazanit.
