Sipas raporteve në media, Europa po i kthen sytë nga Afrika për nevojat e saj energjetike, ndërsa vendet anëtare kërkojnë të ulin varësinë nga importet ruse në mes të konfliktit në Ukrainë.
Ekonomia e tretë më e madhe e BE-së, Italia, siguroi një marrëveshje javën e kaluar me Algjerinë për më shumë importe të gazit natyror. Vendi i Afrikës së Veriut tashmë furnizon Evropën me gaz nëpërmjet tre tubacioneve, një prej të cilëve shkon në Itali. Dy tubacionet e tjera janë të lidhura me Spanjën.
Autoriteti Shtetëror i Hidrokarbureve (ENI) në Itali nënshkroi gjithashtu një marrëveshje të mërkurën me kompaninë shtetërore të Egjiptit Natural Gas Holding për të nxitur eksportet e gazit në Evropë.
Marrëveshjet vijnë pas një takimi midis ambasadorëve evropianë dhe Kompanisë Kombëtare të Naftës Nigeriane (NNPC) të hënën e kaluar, për të “forcuar partneritetin” në sektorin e energjisë.
Ndërkohë sipas Bloomberg, kryeministri italian Mario Draghi pritet të udhëtojë në Afrikën qendrore dhe jugore këtë javë për një marrëveshje të mundshme në Republikën e Kongos dhe Angolës. Të gjitha këto marrëveshje së bashku mund të ndihmojnë për të zëvendësuar mbi gjysmën e furnizimit që Italia merr nga Rusia që në vitin 2023, sipas Bloomberg.
Rusia furnizon rreth 40% të gazit të BE-së dhe siguron rreth një të tretën e nevojave të bllokut për naftë. Më herët në prill, Bashkimi Evropian miratoi një ndalim të qymyrit rus, por nuk mundi të arrinte një marrëveshje për një embargo të plotë të naftës dhe gazit natyror.
Draghi i tha gazetës Corriere della Sera të dielën se Evropa mund të heqë dorë nga importet ruse të energjisë përmes diversifikimit në një kornizë kohore që ishte “më e shkurtër se sa imagjinonim vetëm një muaj më parë”.
Kryeministri shtoi: “Ne nuk duam të varemi më nga gazi rus, sepse varësia ekonomike nuk duhet të bëhet nënshtrim politik. Për ta bërë këtë, ne duhet të diversifikojmë burimet e energjisë dhe të gjejmë furnizues të rinj.”
