Serbisë i ka kushtuar shumë që të sfidojë presionin e Perëndimit për të vendosur sanksione ndaj Rusisë lidhur me operacionin e saj ushtarak në Ukrainë, tha të dielën presidenti Aleksandar Vuçiç.
Ai beson se do të lavdërohej si hero nga Perëndimi nëse Beogradi do të mbështeste kufizimet ekonomike kundër Moskës.
“Ata thonë se unë jam tradhtar. I vetmi në Evropë që nuk ka vendosur sanksione ndaj Rusisë dhe nga një vend kaq i vogël. Më thirrni si të doni, por populli ka treguar se çfarë mendon gjatë zgjedhjeve.” – tha Vuçiç për Pink TV.
Vuçiç u rizgjodh me 58% të votave në fillim të këtij muaji. Ai tha vazhdimisht se Beogradi ka qenë nën presion serioz dhe ‘shantazh’ për t’u bashkuar me kufizimet e vendosura ndaj Rusisë pasi ajo filloi një ofensivë në shkallë të gjerë kundër Ukrainës në fund të shkurtit.
“Nëse do të doja të bëhesha heroi numër një në botë, do të mjaftonte të thosha diçka kundër Putinit dhe të gjithë do të më jepnin çmime dhe do të më quanin demokrati më i madh në botë.” – shtoi kreu i shtetit serb.
Presidenti tha gjithashtu se ndalimi i naftës dhe gazit nga Rusia do të dëmtonte ekonominë serbe.
“Në baza ditore, ne duhet të marrim vendime që janë në dobi të qytetarëve të Serbisë.”
Vuçiç akuzoi gjithashtu Kievin dhe një shtet të paidentifikuar të BE-së për një seri kërcënimesh të rreme me bomba ndaj avionëve të pasagjerëve të ‘Air Serbia’. Më shumë se një duzinë avionësh u detyruan të kthehen në Beograd ose Moskë, ndërsa fluturimet e tjera ishin vonuar dhe aeroporti i Beogradit u evakuua të paktën tre herë gjatë disa javëve të fundit.
“Shërbimet e huaja të inteligjencës të dy vendeve po e bëjnë këtë. Njëri është një vend i BE-së dhe Ukraina është një tjetër.” – tha presidenti.
Kërcënimet për bomba filluan pasi Serbia refuzoi të mbështesë një ndalim të BE-së për fluturimet ruse.
