Elon Musk thuhet se është i gatshëm të shpenzojë midis 10-15 miliardë dollarë nga paratë e tij për të privatizuar Twitter-in dhe po planifikon të nisë një ofertë tenderi, sipas dy burimeve të njohura me këtë çështje, të cituar nga New York Post.
Oferta do të bëhet për rreth 10 ditë, raportoi e përditshmja të martën, duke shtuar se miliarderi ka shfrytëzuar ‘Morgan Stanley’ për të mbledhur 10 miliardë dollarë të tjerë. Musk, i cili më parë kishte blerë 9.1% të aksioneve të Twitter-it, mund të jetë gjithashtu i gatshëm të marrë hua kundrejt aksioneve të tij aktuale nëse është e nevojshme, një lëvizje që mund të mbledhë disa miliardë dollarë shtesë.
Javën e kaluar, Musk ofroi blerjen e Twitter për 54.20 dollarë për aksion, ose rreth 43 miliardë dollarë, shumë më lart se vlerësimi i tanishëm i kompanisë.
Të premten, kompania e mediave sociale miratoi strategjinë për të mbrojtur veten nga një kontroll i mundshëm ‘armiqësor’. Taktika i lejon aksionerët të blejnë aksione të kompanisë në të ardhmen, duke zbehur kështu aksionet e njësisë ekonomike që tenton ta ‘gllabërojë.
Pas ofertës së Musk, më shumë firma me kapital privat kanë shprehur interes për të marrë pjesë në një marrëveshje për Twitter, thanë njerëz të njohur me këtë çështje, të cituar nga Reuters. Interesi u shfaq pasi ‘Thoma Bravo’, një firmë e kapitalit privat e fokusuar në teknologji, kontaktoi platformën e mediave sociale për të eksploruar një blerje që do të sfidonte ofertën e Musk.
‘Apollo Global Management’ thuhet se po kërkon të sigurojë financim për çdo marrëveshje dhe është i hapur për të punuar me Musk ose çdo ofertues tjetër.
