Ministri i Jashtëm rus Sergei Lavrov ka paralajëmruar Perëndimin që të mos nënvlerësojë rreziqet e konfliktit bërthamor mbi Ukrainën.
Gjatë një interviste të transmetuar në televizionin shtetëror të hënën, Lavrov paralajmëroi se konflikti në Ukrainë rrezikonte të përshkallëzohej në një luftë të tretë botërore dhe se NATO ishte “në thelb” e përfshirë në një luftë prokure me Moskën duke furnizuar Kievin me armë.
Lavrov tha se thelbi i çdo marrëveshjeje për t’i dhënë fund konfliktit në Ukrainë do të varet kryesisht nga situata ushtarake në terren.
Intervista u transmetua disa orë pasi sekretari amerikan i shtetit Antony Blinken dhe sekretari i mbrojtjes Lloyd Austin vizituan Kievin dhe premtuan më shumë ndihmë ushtarake për Ukrainën. Austin tha se Shtetet e Bashkuara donin ta shihnin Rusinë të “dobësuar” dhe u zotuan të armatosin Ukrainën për ta ndihmuar atë të fitojë kundër Moskës.
Gjatë intervistës, Lavrov u pyet për rëndësinë e shmangies së Luftës së Tretë Botërore dhe nëse situata aktuale ishte e krahasueshme me krizën e raketave kubane në vitin 1962, një pikë e ulët në marrëdhëniet SHBA-Sovjetike.
Lavrov tha se Rusia po bënte shumë për të mbështetur parimin e përpjekjes për të parandaluar luftën bërthamore me çdo kusht.
“Ky është pozicioni ynë kyç mbi të cilin ne bazojmë gjithçka. Rreziqet tani janë të konsiderueshme.”– tha Lavrov, sipas Al Jazeera.
Ai shtoi: “Nuk do të doja t’i ngrija artificialisht këto rreziqe. Shumë do ta donin këtë. Rreziku është serioz, real. Dhe ne nuk duhet ta nënvlerësojmë atë.”
Ministri i Jashtëm tha se “Nato, në thelb, është përfshirë në një luftë me Rusinë përmes një përfaqësuesi dhe po e armatos atë përfaqësues. Lufta do të thotë luftë.”
Ai kritikoi gjithashtu qasjen e Kievit ndaj bisedimeve të paqes me Moskën.
