Një vit nga vrasja në Tiranë e biznesmenit Behar Sofia, SPAK njofton mbylljen e hetimeve. Përmes një njoftimi për mediet, Prokuroria e Posaçme bën me dije se ka dërguar në gjykatë dosjen ndaj pesë të dyshuarve si grupi i vrasjeve me pagesë.
Kështu, të dyshuarit për këtë krim janë Leonard Xhixha, Bujar Leza, Skënder Vathi, Xhuljano Visha dhe Ernejt Shyti, të cilët janë dërguar për gjykim me masë sigurimi “arrest në burg”.
Kujtojmë se 66-vjeçari Behar Sofia, u ekzekutua mëngjesin 25 shkurtit të vitit të kaluar afër Piramidës në Tiranë, ndërsa vrasësi u largua me biçikletë.
Njoftimi i Plotë:
Prokuroria e Posaçme kundër Korrupsionit dhe Krimit të Organizuar, pas përfundimit të hetimeve paraprake, në datën 26.04.2022 përcolli në Gjykatën e Posaçme për Korrupsionin dhe Krimin e Organizuar kërkesën për “Dërgimin për gjykim” të procedimit penal nr.150/1 të vitit 2022 në ngarkim të të pandehurve;
- Leonard Xhixha,
- Bujar Leza,
- Skënder Vathi,
- Xhuljano Visha,
- Ernejt Shyti.
Të pestë të pandehurit janë dërguar për gjykim me masë sigurimi arrest në burg dhe të akuzuar për veprat penale si vijon:
“Vrasja me paramendim” në dëm të viktimës Behar Sofia, finalizuar në datën 25.2.2021;
“Mbajtja pa leje dhe prodhim i armëve, armëve shpërthyese dhe i municionit”, të kryera në bashkëpunim të veçantë, atë të grupit të strukturuar kriminal;
“Grupi i strukturuar kriminal” në rolin e pjesëmarrësit dhe “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 78/2 278/1, 333/a/2 dhe 334 i Kodit Penal.
