Ish-deputeti i PD-së Patozi i është përgjigjur ftesës së ish-kryeministrit Berisha mbrëmjen e djeshme për t’u rikthyer.
Në një deklaratë të shkurtër Patozi shkruan se nuk është në kërkim të ndonjë partie, për më tepër të një të tille që është katandisur si mos më keq nga drejtimi i gabuar prej shumë kohësh.
Ai thekson se ndihet rehat me jetën e tij ndërsa me jo pak ironi shkruan në fund se ftesa në mes të natës i kujton largimin para 5 vitesh, ‘pa votë e pa mbledhje forumesh’, shkruan Patozi.
“Faleminderit nuk jam në kërkim. Meqë më paska dalë emri mbrëmë dhe media është shprehur shumë e interesuar, e gjeta të udhës të jap një përgjigje të shkurtër. Faleminderit, që na kujtojnë ende, por unë nuk jam në kërkim të ndonjë partie. Aq më pak të atij lloji, që janë katandisur si mos më keq nga drejtimi i gabuar për një kohë të gjatë dhe të pandërprerë. Ndjehem shumë rehat sot me jetën dhe lirinë time, ndërkohë që për asnjë çast në këtë botë nuk kam menduar se politikë bëhet vetëm brenda një partie dhe vetëm rrotull një udhëheqësi legjendar dhe të pagabueshëm. Por meqë ftesa verbale për “dasêm” qenka bërë pas mesit të natës, kujtoj se e njëjta gjë ka ndodhur edhe 5 vjet më parë, kur na larguan. Natyrisht, pa votë dhe pa mbledhje forumesh politike. Të paktën, orën mund ta kishin ndërruar. Se në dorë vetë e kishin, si atëherë edhe tani.” – shkruan Patozi.
