Zyrtarët kanadezë të shëndetësisë kanë hequr një ndalim për dhurimin e gjakut nga burrat homoseksualë, që prej kohësh është parë si homofobik.
Siç shkruan BBC, rregulli i vjetër i ndalonte dhurimet e gjakut nga burrat që kishin bërë seks me burra të tjerë brenda tre muajve nga dhënia e gjakut.
“Health Canada” e quajti lëvizjen “një moment historik të rëndësishëm drejt një sistemi më gjithëpërfshirës të dhurimit të gjakut”. Health Canada është departamenti i qeverisë së Kanadasë përgjegjës për politikën kombëtare të shëndetit.
Vendet në mbarë botën kanë hequr ndalime të ngjashme vitet e fundit. Që nga 30 shtatori, donatorët e mundshëm nuk do të pyeten më për orientimin e tyre seksual gjatë procesit të shqyrtimit, por përkundrazi nëse përfshihen në ndonjë sjellje seksuale me rrezik më të lartë.
Ndryshimi i politikës vjen pasi Shërbimet Kanadeze të Gjakut, e cila mbledh dhurimet e gjakut dhe produkteve të gjakut në pjesën më të madhe të vendit, paraqiti një kërkesë vitin e kaluar për të hequr rregullin në “Health Canada”, e cila njoftoi se e kishte miratuar atë.
Ndalimi për burrat homoseksualë u vendos për herë të parë në vitin 1992 si një masë për të parandaluar hyrjen e HIV-it në furnizimin me gjak. Kjo erdhi pas një skandali të shëndetit publik të viteve 1980, ku rreth 2 mijë njerëz u infektuan me HIV dhe deri në 60 mijë me hepatit C nga dhurimet e gjakut. Ndalimi i dhurimit ishte fillimisht i përjetshëm, por kjo politikë u lehtësua për herë të parë në vitin 2013, kur burrat që kryenin marrëdhënie seksuale me burra u lejuan të dhuronin pasi kishin abstenuar për pesë vjet. Kjo më vonë u lehtësua në periudhën aktuale tre mujore.
Partia Liberale e kryeministrit Justin Trudeau e bëri fillimisht premtimin për t’i dhënë fund ndalimit të donacioneve gjatë fushatës zgjedhore të vitit 2015 dhe është përballur me kritika në rritje për shkak të mos mbajtjes së këtij premtimi.
Në një konferencë shtypi të enjten, Trudeau tha se ndryshimi ishte shumë i vonuar, duke e quajtur qasjen aktuale “diskriminuese dhe të gabuar”.
