Gjermania po padit Italinë në gjykatën më të lartë të OKB-së në raundin e fundit të mosmarrëveshjes së gjatë mbi pretendimet naziste për kompensim, zbuloi të premten Gjykata Ndërkombëtare e Drejtësisë (ICJ).
Në kërkesën e saj, Gjermania pretendon se Roma ka vazhduar t’i lejojë viktimat e krimeve naziste të luftës të paraqesin kërkesa për kompensim nga Berlini, edhe pse në vitin 2012 GJND-ja vendosi se kjo ishte e paligjshme. Sipas këndvështrimit të paditësit, duke vepruar kështu, Italia ‘ka shkelur dhe vazhdon të shkelë detyrimin e saj për të respektuar imunitetin sovran të Gjermanisë’.
Gjermania argumenton se Roma duhet të ndërmarrë hapa efektivë për të parandaluar shkeljet të tilla të ndodhin në të ardhmen, duke ofruar të gjitha garancitë përkatëse.
Berlini thotë se është në dijeni të të paktën 25 çështjeve të lidhura me krimet e Rajhut të Tretë, të cilat janë ngritur kundër Gjermanisë në gjykatat e brendshme italiane që nga vendimi i gjykatës në vitin 2012.
Disa nga procedurat rezultuan në vendime që urdhëronin Gjermaninë të paguante kompensim. Për të zbatuar vendimet, autoritetet italiane janë përpjekur të kapin katër prona shtetërore gjermane në Romë, duke përfshirë ndërtesat që strehojnë Institutin Arkeologjik Gjerman dhe Institutin Goethe.
Gjermania shpjegoi se pavarësisht konfirmimit të statusit jotregtar të këtyre pronave nga qeveria italiane, Gjykata e Romës ka vazhduar me procesin e përmbarimit dhe më 25 maj 2022 do të shpallë vendimin e saj nëse do t’i vendosë ndërtesat në shitje në ankand publik.
“Në rrethanat dhe siç jepet me hollësi më tej më poshtë, Gjermania tani është e detyruar të kërkojë masa të përkohshme nga Gjykata për të mbrojtur të drejtat e saj kundër dëmit të pariparueshëm.” – thuhet në kërkesën e Gjermanisë.
Mosmarrëveshja midis Gjermanisë dhe Italisë mbi pretendimet e dëmshpërblimit për krimet naziste nisi në vitin 2008 kur Berlini u urdhërua nga gjykata më e lartë italiane të paguante afërsisht 1 milion euro për familjet e nëntë viktimave, të vrarë nga gjermanët në vitin 1944 në Toskanë.
Gjermania argumenton se që nga fundi i Luftës së Dytë Botërore dhe disfatës së regjimit nazist, ajo ka paguar miliarda euro për vendet e prekura në përputhje me traktatet e paqes dhe dëmshpërblimit.
