Qeveria kineze ka urdhëruar një ‘test stresi’ gjithëpërfshirës për të parë se si vendi do të trajtojë sanksionet njësoj me ato të vendosura nga Perëndimi ndaj Rusisë, raportoi të mërkurën gazeta ‘The Guardian’, duke cituar burime.
Një person i paidentifikuar me njohuri të drejtpërdrejta për këtë çështje i tha gazetës se një stërvitje e gjerë filloi rreth fundit të shkurtit dhe fillimit të marsit kur aleatët perëndimorë vendosën sanksione gjithëpërfshirëse kundër Moskës. Burimi tha se disa agjencive kryesore qeveritare kineze u është kërkuar të japin përgjigje si mund të reagojnë nëse Perëndimi vendos embargo të ngjashme ndaj Kinës.
Tong Zhao, një bashkëpunëtor i lartë në ‘Carnegie Endowment for International Peace’ me qendër në Pekin, tha se ‘nga këndvështrimi i Pekinit, nëse aleatët perëndimorë të udhëhequr nga SHBA mund të marrin masa të tilla kundër Moskës, ata mund të bëjnë të njëjtën gjë me Kinën. Prandaj, duhet të dijë se sa elastik është në të vërtetë vendi’.
Zhao shtoi se ‘gjatë viteve të fundit, ka pasur një shqetësim në rritje në mesin e udhëheqjes së Pekinit se një konflikt strategjik midis Kinës dhe Perëndimit mund të ndodhë për çështjen e Tajvanit’.
Financial Times raportoi më herët se ministria kineze e financave dhe Banka Qendrore mbajtën një takim muajin e kaluar me bankat vendase dhe të huaja, duke përfshirë HSBC, për të diskutuar se si mund të mbroheshin asetet e Kinës jashtë shtetit nëse sanksionet e stilit të Rusisë të udhëhequra nga SHBA dhe aleatët e saj perëndimorë i vihen Pekinit zyrtar.
