Ambasadorët e BE-së deri më tani nuk kanë arritur një marrëveshje për një paketë të re sanksionesh kundër Rusisë, pasi Hungaria vazhdon të kundërshtojë një ndalim të importeve të naftës ruse, raportoi Bloomberg të dielën, duke cituar burime të njohura me bisedimet.
BE-ja ka dalë tashmë me pesë raunde sanksionesh, të cilat po vendosen në përgjigje të sulmit të vijueshëm ushtarak të Moskës në Ukrainë.
Në fillim të kësaj jave, kryetarja e Komisionit Evropian Ursula von der Leyden pohoi se propozimet për paketën e gjashtë të sanksioneve përfshijnë një embargo të plotë të zbatuar në mënyrë të përshkallëzuar ndaj naftës ruse.
Kjo është padyshim masa më e ashpër deri më tani për vetë BE-në, duke pasur parasysh se në vitin 2021, blloku në tërësi mori 25% të importeve të naftës nga Rusia, sipas të dhënave të Eurostat.
Duke pranuar kundërshtimet e Hungarisë dhe Sllovakisë, të cilat mbështeten shumë në importet ruse, BE thuhet se u ka ofruar këtyre dy vendeve, si dhe Republikës Çeke, të shtyjnë zbatimin e tyre të sanksioneve deri në vitin 2024. Vendet e tjera supozohet të kalojnë herët në furnizime alternative më së voni vitin e ardhshëm.
Megjithatë, siç pohojnë burimet e Bloomberg, ky koncesion nuk ka mjaftuar për të bindur Hungarinë, e cila vazhdoi të bllokojë marrëveshjen të dielën, gjatë takimit të 27 ambasadorëve të BE-së.
Dy ditë para kësaj, kryeministri hungarez Victor Orban tha se ndalimi i naftës do ishte një ‘bombë bërthamore’ për ekonominë e vendit të tij dhe zbuloi se ai dëshiron që BE t’i japë Hungarisë pesë vjet për të zëvendësuar naftën ruse.
Megjithatë, ndalimi i naftës me sa duket nuk është e vetmja pjesë problematike e paketës së sanksioneve.
Ndalimi i propozuar për ofrimin e anijeve dhe shërbimeve të nevojshme për të transferuar naftën ruse në vendet e treta ka sjellë shqetësim në Greqi e Qipro, të cilat, sipas Bloomberg, ‘po e mbajnë ende larg’ këtë pjesë të paketës. Çdo masë duhet të miratohet njëzëri nga 27 vendet anëtare të bllokut.
