Zëdhënësi i presidentit Ilir Meta, Tedi Blushi ka reaguar pas një shkrimi të botuar në median austriake “Kronen Zeitung” që e akuzon presidentin shqiptar për lobim përmes një kompanie offshore qiprote për t’u fotografuar me ish-presidentin amerikan Donald Trump.
Gazeta tregon historinë e një denoncuesi që kërkon mbrojtje në Austri nga kërcënimet me vdekje që ai ka marrë, pasi zbuloi një aferë të Presidentit Shqiptar, Ilir Meta.
Në një postim në rrjetet sociale, Blushi shprehet se ato që janë shkruar sot nga kjo gazetë janë shpifje dhe gënjeshtra të hedhura në tregun mediatik kohë më parë.
“Presidenti i Republikës, Sh.T.Z Ilir Meta është njohur sot me një shkrim pa autor të publikuar në gazetën austriake ‘Kronen Zeitung’, artikull që përmban veçse shpifje dhe gënjeshtra, të hershme dhe të konsumuara prej vitesh.
Këto shpifje, mjerisht të fabrikuara dhe të hedhura në tregun mediatik edhe kohë më parë, e kanë marrë përgjigjen shumë të qartë dhe në mënyrë asgjesuese, që në prill të vitit 2018.”- shkruan Blushi.
Ai paralajmëron median austriake se do ta padisë për shpifje dhe prishje të imazhit publik.
“Edhe kjo përpjekje e radhës, e rifabrikuar në mënyrë qesharake dhe vulgare, do të marrë përgjigje përpara drejtësisë austriake.
Presidenti i Republikës, ka autorizuar stafin dhe mbrojtësit ligjorë, që të përgatisin menjëherë padinë ‘Për përhapjen e të dhënave të pavërteta’, ‘Shpifje’, ‘Cenim të imazhit publik’, që në këtë rast cenon rëndë edhe interesat e larta shtetërore.
Në këtë mënyrë, shpifësit do të marrin përgjigjen e merituar përballë drejtësisë.
Presidenti i Republikës garanton se beteja e Tij për mbrojtjen e interesit publik dhe luftën kundër korrupsionit, jo vetëm që nuk do të ndalet, por do të përshkallëzohet, që nga zbardhja e plotë e aferës së inceneratorëve (që deri tani vetëm sa është gërvishtur), si dhe të gjitha aferat e tjera.”- përfundon reagimi i zëdhënësit të
Presidencës.
Por çfarë shkruante gazeta austriake? Sipas artikullit në fjalë, një detektiv që ka zbuluar aferat korruptive të Metës është fshehur në Austri, për shkak të kërcënimeve me vdekje që kishte marrë.
Ky “dëshmitar” akuzon presidentin Meta ka paguar nëpërmjet një kompanie offshore 700 mijë dollarë për të marrë pjesë në ceremoninë e inagurimit të Presidentit Donald Trump në vitin 2017. Dhe po ashtu gazeta ndalet në pamjen e jashtme të bashkëshortes së presidentit shqiptar, njëkohësisht kryetare e LSI-së zonjën Monika Kryemadhi e cila akuzohet për operacione plastike.
ARTIKULLI I KRONE:
Dëshmitari kryesor kërkon mbrojtje në Vjenë: thriller për Presidentin
Lotët rrjedhin nëpër faqe, duart dridhen, zëri meket. Frika e një denoncuesi ndaj autoriteteve shqiptare është e dukshme gjatë një takimi me “Krone” në një vend sekret. Çfarë ka ndodhur? Denoncuesi iku në Austri për shkak të akuzave dhe frikës së një atentati. Aty ku tani duhet të kishte marrë statusin e mbrojtjes. Ai mund të trondisë mjedisin politik shqiptar.
Ajo që tregon denoncuesi në prani të avokatëve të njohur të Vienës ju bën të uleni dhe të dëgjoni me vëmendje. Provat mund të tronditin peizazhin politik të Shqipërisë dhe të rrëzojnë askënd tjetër veç presidentit të Shqipërisë.
Ilir Meta (53 vjeç) ka mbajtur jo pak poste në karrierën e tij. Ai themeloi partinë Lëvizja Socialiste për Integrim, të cilën e drejtoi deri në vitin 2017. Ai ka qenë kryetar i Parlamentit për disa vite dhe është President i Republikës që nga viti 2017. Që nga ajo kohë erdhën flukse parash, që dëshmitari kryesor i përshkroi si “thellësisht të korruptuara”.
Është e paqartë se kush e ka paguar udhëtimin në Uashington, sepse më 20 janar 2017, Meta ndau një foto të tij dhe një kolegeje në inaugurimin e Donald Trump përballë Kapitolit në Uashington.
Për të fituar akses në inaugurimin dhe zyrtarët republikanë, ata thuhet se lobuan me zell përmes një kompanie guaskë qipriote. Kostoja: 700,000 dollarë. Deri më sot, është e paqartë se kush ka paguar në të vërtetë për të. Vetë Meta pretendon se është ftuar nga republikanët. Sipas dokumenteve gjyqësore amerikane, 700,000 dollarë kanë kaluar përmes kompanisë offshore Dorelita Limited nga një avokat i afërt me Metën.
Pak javë para inaugurimit është lidhur një kontratë mes palës së LSI-së dhe avokatit, për pjesëmarrjen në inaugurim. Menjëherë pas kësaj, Meta u bë edhe president.
Operacione estetike të dyshimta për Zonjën e Parë
Duke qenë se lobimi me pagesë është i vështirë për t’u pranuar në pozicionin e tij si President, kontrata u ndërpre, për të lidhur menjëherë një kontratë të re për “Dorelitën”, e cila nuk ka asnjë aktivitet biznesi. Në listën e tyre të dyshimtë të shpenzimeve: 50 mijë euro në muaj për takime me senatorë amerikanë, darkë, udhëtime dhe me sa duket edhe operacione estetike për zonjën Meta, Monika Kryemadhi, e cila mori kryesinë e LSI-së nga bashkëshorti i saj.
Në çdo rast, akuzat rëndojnë dhe prezumimi i pafajësisë vlen për çiftin politik.
