Një shtetas turk është arrestuar në aeroportin e Rinasit pasi është kapur me dokumente të falsifikuara me të cilat do udhëtonte jashtë vendit.
Në pranga ka rënë 53-vjeçari me iniciale S.H. Lidhur me rastin janë proceduar penalisht edhe dy shtetas të tjerë.
Një 53-vjeçar me iniciale J.I. banues në Malin e Zi dhe një 48-vjeçar me iniciale N.H., banues në Maqedoninë e Veriut të cilët e kanë transportuar me mjet të arrestuarin dhe sipas policisë kanë pasur dijeni për dokumentet e falsifikuara.
Njoftimi
“Tiranë
Finalizohet operacioni policor i koduar “Tranzit 17”. Operacioni, i zhvilluar nga shërbimet e Policisë Kufitare Rinas, në bashkëpunim me Seksionin për Hetimin e Trafiqeve të Paligjshme në DVP Tiranë.
Goditet një rast i tentativës për të kaluar kufirin me dokumente të falsifikuara. Arrestohet në flagrancë 1 shtetas. Procedohen penalisht 2 të tjerë. Shërbimet e Policisë Kufitare Rinas, në bashkëpunim me Seksionin për Hetimin e Trafiqeve të Paligjshme në DVP Tiranë, në vijim të kontrolleve të detajuara të dokumentacionit që paraqesin shtetasit që hyjnë dhe dalin në PKK Rinas, kanë evidentuar dhe goditur një rast të tentativës për të kaluar kufirin në mënyrë të paligjshme, me dokumente false.
Në përfundim të veprimeve hetimore u arrestua në flagrancë shtetasi turk S. H., 53 vjeç, banues në Turqi, për veprat penale “Falsifikimi i letërnjoftimeve, i pasaportave ose i vizave” dhe “Kalimi i paligjshëm i kufirit shtetëror”. Shëbimet e Policisë, gjatë kontrollit të dokumentacionit të shtetasit S. H., kanë dyshuar se ky shtetas nuk kishte paraqitur dokumentet e tij të identifikimit. Gjatë kontrollit të detajuar rezultoi se dokumentet që ai kishte paraqitur, ishin me gjeneralitetet e një shtetasi tjetër.
Në vijim të veprimeve u proceduan penalisht në gjendje të lirë, për veprën penale “Ndihma për kalim të paligjshme të kufijve”, shtetasit J. I., 53 vjeç, banues në Mal të Zi, dhe N. H., 48 vjeç, banues në Maqedoni, pasi kanë transportuar me automjet shtetasin S. H. dhe kanë patur dijeni që ky shtetas kishte dokumente të falsifikuara. Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.”
