Produktet ushqimore dhe plehrat nga Rusia, Ukraina dhe Bjellorusia duhet të lejohen në tregjet botërore nëse komuniteti global dëshiron të frenojë një krizë ushqimore që po shpaloset, tha Sekretari i Përgjithshëm i OKB-së António Guterres në një takim ministror mbi sigurinë globale të ushqimit.
“Të jemi të qartë, nuk ka zgjidhje më efektive për krizën ushqimore pa riintegrimin e prodhimit të ushqimit ukrainas, si dhe ushqimit dhe plehrave të prodhuara nga Rusia dhe Bjellorusia, në tregjet botërore.” – theksoi ai.
Në fillim të këtij muaji, Guterres paralajmëroi se një e pesta e njerëzimit ishte në rrezik nga varfëria dhe uria për shkak të gjendjes në tregun e drithërave, me çmimet e grurit në rritje pas sanksioneve perëndimore të vendosura ndaj Rusisë dhe Bjellorusisë. Presidenti rus Vladimir Putin deklaroi kohët e fundit se kërcënimi i një zie buke globale është rezultat i ‘obsesionit të sanksioneve’ të Perëndimit.
Sipas Guterres, operacioni ushtarak i Rusisë i ka shtuar problemet që tashmë po ndikonin në gjendjen e vështirë, përkatësisht ndryshimin e klimës dhe pandeminë Covid-19. Rusia, Ukraina dhe Bjellorusia, theksoi ai, janë liderë në prodhimin e plehrave dhe produkteve ushqimore, të cilat nuk duhet të anashkalohen.
Guterres vuri në dukje se Moska duhet të ndalojë bllokimin e eksportit të ushqimit nga portet e Ukrainës. Në të njëjtën kohë, plehrat dhe produktet ushqimore nga Rusia duhet të lejohen pa pengesa në tregjet botërore, vazhdoi ai.
Ndërkohë, sekretari amerikan i shtetit, Antony Blinken, mohoi akuzat se sanksionet ndaj Rusisë janë arsyeja e përkeqësimit të situatës ushqimore në botë.
Ai vuri në dukje se Uashingtoni ka bërë përjashtime nga masat kufizuese për plehrat dhe produktet bujqësore, duke shtuar se organizatat ndërkombëtare dhe autoritetet e vendeve të ndryshme të interesuara mund të punojnë së bashku për të hapur korridoret për eksportin e sigurt të ushqimit nga territori i Ukrainës, si nga toka ashtu edhe nga deti.
