Gjermania po spiunohet të paktën po aq sa gjatë Luftës së Ftohtë, ka deklaruar kreu i agjencisë të inteligjencës së vendit. Ai tha se kjo ndodhte pas përkeqësimit të marrëdhënieve midis Perëndimit dhe Rusisë për konfliktin në Ukrainë.
Thomas Haldenwang, presidenti i Zyrës Federale të Gjermanisë për Mbrojtjen e Kushtetutës (BfV), e bëri këtë paralajmërim të enjten gjatë një konference në Berlin.
Sipas mediave lokale, zyrtari tha se “sot, ne vlerësojmë nivelin e spiunazhit kundër Gjermanisë të paktën në të njëjtin nivel me Luftën e Ftohtë – nëse jo dukshëm më i lartë”.
Haldenwang foli gjithashtu për një rrezik në rritje të sabotazhit në vend, pasi marrëdhëniet midis Berlinit dhe Moskës janë përkeqësuar në mënyrë dramatike që kur Rusia nisi ofensivën e saj ushtarake kundër Ukrainës.
Shefi i BfV parashikoi se “në një botë armiqësish të hapura dhe sanksionesh drastike, pragu i frenimit për spiunazhin, sabotimin dhe ndikimin e paligjshëm do të vazhdojë të bjerë”. Sipas gazetës gjermane Tagesspiegel, Haldenwang pohoi gjithashtu se po shfaqet një “konkurrencë e re e sistemit” midis demokracive dhe shteteve autoritare.
Zyrtari tha shërbimet ruse të inteligjencës që dyshohet se punojnë në Gjermani po përdorin “aktorë me ndikim të ndryshëm, të cilët përveç agjentëve të shërbimit të inteligjencës përfshijnë edhe grupe kërkimore ose gazetarë.”
Duke i bërë jehonë vlerësimit të Haldenwang, Ministrja e Brendshme e Gjermanisë Nancy Faeser paralajmëroi gjithashtu se “kërcënimi për sigurinë tonë përmes luftës së re në Evropë është real”. Sipas raporteve, ajo tha se Gjermania mund të presë spiunazh dhe sulme kibernetike, si dhe “fushata të ndikimit nga fuqitë e huaja, që synojnë të destabilizojnë demokracinë tonë përmes propagandës, gënjeshtrave dhe dezinformimit të synuar”.
Në fillim të prillit, Gjermania dëboi 40 diplomatë rusë të dyshuar për lidhje me agjencinë ruse të spiunazhit. Një numër vendesh të tjera evropiane u kanë treguar diplomatëve rusë derën me pretekste të ngjashme që nga fundi i shkurtit, kur Kremlini filloi fushatën e tij ushtarake kundër Ukrainës.
